Саха сиригэр патриотическай иитиигэ анаммыт стратегическай сессия саҕаланна

Бүгүн, тохсунньу 30 күнүгэр, «Патриот» ыччат киинигэр Саха Өрөспүүбүлүкэтигэр патриотическай иитиигэ Анал ирдэбили оҥорууга анаммыт стратегическай сессия үлэтин саҕалаата. Тэрээһини СӨ Ыччат бэлиитикэтигэр министиэристибэтэ уопсастыбаннай тэрилтэлэри уонна бэтэрээннэр түмсүүлэрин бэрэстэбиитэллэрин кытта тэрийдилэр.

Мунньах сүрүн соруга – өрөспүүбүлүкэ ыччатыгар дойдуга тапталы уонна гражданскай позицияны иитиини тупсарарга туһуламмыт көдьүүстээх дьаһаллары уонна сүбэлэри оҥоруу буолар.

Миниистир бэлиэтээбитинэн, оҥоһуллубут Анал ирдэбил педагогтарга, уһуйааччыларга уонна ыччат көҕүлээһиннэрин тэрийээччилэргэ универсальнай инструменынан буолуохтаах. Докумуон чопчу тутула – оҕолорго уонна эдэр ыччакка патриотическай хаачыстыбалары түһүмэҕинэн сайыннарыыны ыытыы, ону тэҥэ онуоха оҥоһуллар тэрээһиннэр хаачыстыбаларын сыаналыыр мэхэньиисими көрүү буолар.

Сиэссийэ аһыллыытыгар СӨ Ыччакка миниистирэ Петр Шамаев Патриотическай иитиини сайыннарар Анал ирдэбили (Единый стандарт патриотического воспитания) оҥоруу курдук олус суолталаах стратегическай соругу быһаарыахтаахпыт, бу биһиги кэлэр кэмҥэ тиһиктээх үлэбит тирэҕэ буолар диэн эттэ.

«Бүгүн биһиги олус суолталаах стратегическай соругу – Саха Өрөспүүбүлүкэтигэр Патриотическай иитии биир кэлим Анал ирдэбилин (Стандарт) оҥорууну быһаара муһуннубут. Бу көннөрү докумуон буолбатах. Бу биһиги кэлэр кэмнээҕи тиһиктээх үлэбит торума буолар. Тоҕо биһиэхэ бу нааданый? Өрөспүүбүлүкэбит улахан, ол гынан баран, билигин да бытанан сылдьар баай кыаҕын биир кэлим, күүстээх тиһиккэ кубулутуохтаахпыт. Биһиэхэ элбэх үлэ барда: дойдуга биир бастакынан эрэгийиэннээҕи сокуоннар ылыллыбыттара, Координационнай сүбэ тэриллибитэ, сылга 200-тэн тахса тэрээһин ыытыллар, 325 байыаннай-патриотическай кулууп, бу эйгэҕэ 55 кэммиэрчэскэйэ суох тэрилтэ баар. Биһиги сүүһүнэн тыһыынча киһини, ордук ыччаты, хабабыт», – диэн СӨ Ыччакка миниистирэ Петр Шамаев бэлиэтээтэ.

Миниистир эппитинэн, патриотизмы иитиигэ өрөспүүбүлүкэ эрэгийиэннэр ортолоругар 71-с эрэ миэстэҕэ турар. Ол аата төһө даҕаны кыһаллан үлэлээтэрбит, биир кэлим ирдэбил суоҕунан, үлэ көдьүүһэ көстүбэтин этэр.

«Бу, төһө да кыһаллыбыппыт иһин, биһиэхэ саамай сүрүн үлэ тиийбэтин туоһулуур: сомоҕолоһуу, систиэмэ уонна чуолкай түмүктэр. Билиҥҥи үлэбит ситэтэ суох систиэмэлээх. Араас отделлар, тэрилтэлэр, кулууптар чуолкай сомоҕолоһуута уонна тиһигэ суох бэйэлэрин ньымаларынан үлэлииллэр. Онон, ирдэбил сыала-соруга – министиэристибэлэртэн уонна муниципальнай тэриллиилэртэн саҕалаан оскуолаларга, үнүбэрсиэттэргэ, уопсастыбаннай түмсүүлэргэ тиийэ бары биир сомоҕо буолан, биир кэлим ньыманан дьаһаналларыгар методологическай олоҕу оҥоруу буолар”, — диэтэ миниистир.

Оҥоһуллубут ирдэбил патриотическай өйү-санааны иитэр дьоҥҥо бэйэтэ ураты «шпаргалка» буолуоҕа. Докумуоҥҥа тэрээһиннэри ыытыыга сүбэлэр, кинилэр ситиһиилэрин сыаналыыр киритиэрий уонна педагогтар уонна оҕо кэллэктииптэрин салайааччыларын квалификацияларын үрдэтэр бырагыраамалар киириэхтэрэ.

Сиэссийэ түмүк сүбэлэрэ эрэгийиэҥҥэ патриотическай хамсааһын сайдыытын саҥа стратегиятын оҥорорго, аныгы кэмҥэ сайдан иһэр көлүөнэни традыыга көмөлөһүөҕэ.

Күн иккис аҥарыттан стратегическай сессия кэнниттэн 100-тэн тахса киһи 7 хамаандаҕа арахсан, патриотическай иитии эйгэтигэр биир кэлим ирдэбилгэ киирэр бэйэлэрин бырайыактарын оҥорон билиһиннэрдилэр.

Бүгүҥҥү сиэссийэ үлэтин түмүгүнэн, анал ирдэбил оҥоһуллуоҕа,  чуолаан ыччакка Ийэ дойдуга ис сүрэхтэн тапталы, бэриниилээх буолууну  иҥэрэргэ чахчы көдьүүстээх систиэмэни тутар кыахтаахпытын быһаарыаҕа. Бу саҕалааһын ситиһиититтэн кэлэр көлүөнэлэр уонна дойду бэйэтин дьылҕата тутулуктаах.