Саха сиригэр «Пиэрмэр оскуолата» выпускнига Россельхозбаан гранын ылла

Саха сиригэр «Пиэрмэр оскуолата» иккис түһүмэҕин выпускнига Россельхозбаантан «АгроБизнес» гранын ылла.

Мэҥэ Хаҥаластан хортуоппуй үүннэрээччи Иннокентий Борисов бизнес-былаана  «Пиэрмэр оскуолата» выпускниктар ортолоругар бастыҥынан ааттанна уонна 300 тыһ. солк. гранынан наҕараадаланна.  Куонкурус хамыыһыйатын түмүгүнэн, кыайыылааҕынан аймахтарын кытта хортуоппуйу үүннэриинэн дьарыктанар бааһынай хаһаайыстыба (пиэрмэр) чилиэнэ Иннокентий Борисов буолла. «Быйан» бааһынай хаһаайыстыба – бу Мэҥэ Хаҥалас улууһун Ороссолуода сэлиэнньэтин дьиэ кэргэттэрэ, кинилэр номнуо 10-тан тахса сыл Саха сирин олохтоохторун хортуоппуйунан хааччыйаллар.

«Пиэрмэр оскуолатын» туһунан былырыын үөрэммит бастакы выпускниктарыттан истэн билбитим. Үөрэх кэмигэр ордук атын хаһаайыстыбалары илэ харахпытынан билсэргэ кыах бэриллибитин бэлиэтиэхпин баҕарабын, онно атын хаһаайыстыбалар хайдах үлэлииллэрин көрөн билсэрбит олус интэриэһинэй этэ. Кырдьыгынан этэр буоллахха, грант кыайыылааҕа буолуо дии санаабатаҕым. Билигин даҕаны грант сумматын туохха туһанарбын быһаара иликпин», — диэн пиэрмэр Иннокентий Борисов санаатын үллэстэр.

Хаһаайыстыба бас билиигэ 10 га арыый элбэх бааһыналаах, манна сылга ортотунан 70 туонна үүнүүнү хомуйаллар. Саамай бастыҥ харайыыга хаачыстыбалаах уонна үчүгэй үүнүүнү биэрэр хортуоппуйунан Розара суорда буолбут. Борисовтар дьиэ кэргэттэрэ сыл ахсын бу үүннэрбит хортуоппуйу күһүҥҥү дьаарбаҥкаҕа уонна сыл устата нэһилиэнньэҕэ атыылыыллар. Кинилэр Саха сирин олохтоохторугар амтаннаах уонна экологическай ыраас хортуоппуйу хааччыйыыга салгыы тохтообокко үлэлэһэллэрин былаанныыллар.

«Иннокентий Борисов бизнес-былаана, бастатан туран, дьиҥнээх олоҕу кытта сибээстээх, бары өттүнэн бэлэм бизнес-бырайыак буоларын көрдөрдө. Ону таһынан кини сүрүн үлэтинэн үүнээйини олордууга уонна хортуоппуйу үүннэриигэ туһуланар. Манна барыта учуоттанна: хортуоппуй сиэмэтэ, олордор сирэ, үлэһиттэрэ, ырыынакка атыыта, үп-харчы киллэриитэ. Ааптар уопута чопчу көстөр — хортуоппуйу үүннэрииттэн уонна хайдах атыылыыр туһунан», — диэн Россельхозбаан Саха сиринээҕи салаатын дириэктэрэ, «Грант Агробизнес» куонкурус дьүүллүүр хамыыһыйатын чилиэнэ Василий Тимофеев эттэ.

Санатан эттэххэ, «Пиэрмэр оскуолата» бырайыагынан Россельхозбаан Саха сиригэр пиэрмэрдэри үөрэтиинэн 2023 сылтан саҕалаабыта. Саха сиригэр бастакы үөрэх ыытыллыбыта, оттон атын эрэгийиэннэргэ ахсыс уочараттаах үөрэх буолан ааспыта. Саха сиригэр үөрэх 2024 сыл балаҕан ыйыгар саҕаламмыта уонна 23 пиэрмэрин түмпүтэ. Устудьуоннар бары  икки хайысханан — «Үүнээйи үүннэриитэ» уонна «Сүөһү иитиитэ» үс ый устата үөрэммиттэрэ, ол кэннэ бизнес-былааннарын көмүскээбиттэрэ, диэн Тыа хаһаайыстыбатын министиэристибэтин пресс-сулууспата иһитиннэрэр.