Саха сириттэн киирбит 3000 тахса боппуруос быһаарыллыбыт

Норуодунай фронт эрэгийиэннээҕи салаатын үлэһитэ Дмитрий Паньков этэринэн, Арассыыйа Бэрэсидьиэнэ ыыппыт быһа кэпсэтиитигэр Саха сириттэн киирбит 3000-тан тахса боппуруос быһаарыллыбыт.

«Саха сиригэр Норуодунай фронт – кэтээн көрөөччү эрэ буолбатах. Биһиги уопсастыбаҕа мэктиэлиирбит быһыытынан, кыһалҕалары быһаарарга күүскэ кыттыһабыт. Биһиги дьаһалбыт куруук чопчу уонна түмүктээх буоларга туһуланаллар», – диэтэ Дмитрий Паньков.

Ааспыт сылга Арассыыйа Бэрэсидьиэнэ ыыппыт быһа ситимигэр Саха сирин олохтоохторуттан 10 тыһыынчаттан тахса ыйытыы киирбит. “Бары ыйытыыларга хоруйдар бэриллибиттэрэ, сорох ыйытыылар хатыланаллар да буоллар. Бары ыйытыылар өрөспүүбүлүкэ уонна муниципальнай былаастар икки ардыларыгар араарыллыбыттара. Ахсынньы 1 күнүнээҕи туругунан 1200 кэриҥэ ыйытыы быһаарылла сыллдьар, ону уопсастыбаннас хонтуруоллуур”, – диэн Дмитрий Паньков чопчулаан биэрдэ.

Быйыл Владимир Путин быһа лиинньийэтэ уонна улахан пресс-кэмпириэнсийэтэ бииргэ ыытыллыахтара. Бэрэсидьиэн кыттыылаах тэрээһин ахсынньы 19 күнүгэр Москва бириэмэтинэн киэһэ (12:00) буолуоҕа. Дойду баһылыга быһа эпииргэ ааспыт сыл түмүктэрин таһаарыаҕа уонна суруналыыстар, дойдубут олохтоохторун ыйытыыларыгар хоруйдуоҕа.

Арассыыйа бары муннуктарыттан төлөпүөнүнэн ыйытыылар уонна суруктар биир кииҥҥэ киирэллэр. 8-800-200-40-40 төлөпүөн нүөмэригэр ыйытыылары Саха сирин Норуодунай фронт ыччатын бэрэстэбиитэллэрэ эмиэ ылаллар. Кинилэр ыйытыыны чопчулаан суруйарга көмөлөһөллөр. Ааспыт сыллааҕы курдук, ыйытыылары ыларга Сбер «Гигачат» диэн оҥоһуу өйө көмөлөһөр.

Ыйытыыны манна биэриэххин сөп:

Төлөпүөнүнэн: 8-800-200-40-40

СМС/MMS суруйуохха сөп: 0-40-40

Сайтарга: moskva-putinu.ru эбэтэр москва-путину.рф «Москва-Путину” мобильнай сыһыарыынан

Суругунан уонна видео ыйытыылары соцситимнэринэн ыытыахха сөп: ВКонтакте уонна Одноклассники «MAX» мессенджер чат-ботун нөҥүө.

Сиһилии: https://www.sakha.gov.ru/news/17192