Саха сиригэр РФ Бэрэсидьиэнин быыбарын иннинээҕи куоластааһын сотору түмүктэниэ

Кулун тутар 9 күнүгэр Усуйаана улууһун Тирэхтээх сиригэр 56 быыбардааччы куоластаата.

Быыбардааччылар «Янолово»  тэрилтэ үлэһиттэрэ. Кинилэри «Сайдыы» нэһилиэгин 615 №-ээх учаастактааҕы быыбардыыр хамыыһыйа чилиэттэрэ куоластаттылар. Оттон бүгүн, кулун тутар 10 күнүгэр,   617 №-дээх учаастактааҕы быыбардыыр хамыыһыйа чилиэттэрэ Тарыҥ Үрэх диэн сиргэ РФ Бэрэсидьиэнин быыбарын иннинээҕи куоластааһынын ыытарга айаннаатылар.

Өлүөхүмэ улууһугар, бэҕэһээ, кулун тутар 9 күнүгэр, ЦРЛС, НПС-14, НПС-15 үлэһиттэрэ куоластаатылар. Куоластааһыны 476 №-дээх учаастактааҕы быыбардыыр хамыыһыйа чилиэттэрэ тэрийдилэр. Куоластааһыҥҥа барыта 140 быыбардааччы кытынна. Бүгүн уустук суоллаах уонна ыраах сытар сирдэргэ куоластааһыннар салҕаналлар. Оттон Өймөкөөҥҥө сылгы баазатыгар 7 быыбардааччы куоластаата. Кинилэргэ Төрүт нэһилиэктэн 439 №-ээх учаастактааҕы быыбардыыр хамыыһыйа чилиэттэрэ тиийдилэр.

Өлөөн эбэҥки национальнай улууһугар Кирбэй 486 №-дээх учаастактааҕы быыбардыыр хамыыһыйа чилиэттэрэ Үөс Төрдө сиргэ  6 табаһыт куоластааһынын тэрийдилэр.

Санаттахха, Саха сиригэр уустук суоллаах, ыраах сытар улуустарынан уонна нэһилиэктэринэн Дойду Бэрэсидьиэнин быыбарын иннинээҕи куоластааһын бу сыл олунньу 25 күнүттэн саҕаланан кулун тутар 14 күнүгэр түмүктэнэр.