Саха сиригэр РФ Бэрэсидьиэнин көмөлөһөөччүтэ Максим Орешкин үлэлиир

Бүгүн Дьокуускайга РФ Бэрэсидьиэнин көмөлөһөөччүтэ Максим Орешкин кэлэн үлэлии сылдьар. Кини Дьокуускай уонна Нерюнгри куораттар маастар-былааннарын олоххо киллэриигэ мунньаҕы ыытыаҕа.

Дьокуускай уонна Нерюнгри маастар-былааннара олохтоохтор көдөһүүлэригэр олоҕуран оҥоһуллубута. Уһук Илин уокурук куораттарын маастар-былааннарын бэлэмнээһин үлэтэ РФ Бэрэсидьиэнэ Владимир Путин сорудаҕынан оҥоһуллар.

Максим Орешкин өрөспүүбүлүкэҕэ оробуочай сырыыта «Дьокуускай» IT-пааркатын уонна Цифровой трансформация ыстаабын үлэтин кытары билсииттэн саҕаланна. Кинини Ил Дархан Айсен Николаев уонна СӨ Инновация, цифровой сайдыы уонна инфокоммуникационнай технология миниистирэ Анатолий Семенов арыаллаан илдьэ сырыттылар.
Инновация, цифровой сайдыы уонна инфокоммуникационнай технология миниистирэ Анатолий Семенов IT-пааркатын уонна Цифровой трансформация ыстаабын бырайыактарын туһунан кэпсээтэ. Кини Саха сирэ цифровизациялааһыҥҥа Арассыыйаҕа 10 бастыҥ иһигэр киирэрин бэлиэтээтэ.
Салгыы бырайыактар резиденнэрэ биир-биир бэйэлэрин үлэлэрин билиһиннэрдилэр. Бастаан «Сильван» баһаары утары үлэ систиэмэтин, коммунальнай өҥөнү төлүүр «Төлөбүр холбоһуктаах докумуона», паромнар сырыыларын кэтээн көрөр «Саха сирин паромнара», хоту сиргэ таһаҕаһы таһыы түһүмэхтэрин ырытан көрөр «Хотугу таһаҕаһы таһыы» бырайыактарын презентациялаан көрдөрдүлэр.

Итини сэргэ СМАРТ:ERP дааннайынан доруобуйа харыстабылыгар наадалаах, киһи түөһүн КТ-снимогын быһаарар «Сайберия» бырагырааманы хайдах туһаналларын көрдөрдүлэр. «Под присмотром», «Алтан» IT-оскуоланы уонна «ЭкспоСкиллс» комплекснай салайыы резиденнэрин бырайыактарын кытта билсистилэр. Манна кыра оҕолор бэйэлэрин хайысхаларынан оҥорбут бородуукталарын туһунан кэпсээтилэр. Оттон «Автономные технологии» ИТ-хампаанньа уонна «ЭкспоСкиллс» IT-оскуола төрүттээччитэ Николай Потапов «Ведроид» сууйар робот хайдах үлэлиирин көрдөрдө.

Максим Орешкин «Дьокуускай» IT-пааркатыгар сылдьан «Сахадрон» хампаанньа пилота суох көтөр аппарааттарын сэргии көрдө.

Эспиэрдэр санаалара

Николай Потапов, «Автономные технологии» ИТ-хампаанньа уонна «ЭкспоСкиллс» IT-оскуола төрүттээччитэ:

— Биһиги оҕолору тоҕустарыттан 19-с саастарыгар диэри үөрэтэбит. Бүгүҥҥү туругунан 120-чэ оҕо үөрэнэр. Кинилэр оонньуулары, сайтары, сыһыарыылары оҥороллор. Биһиги бүгүн ыалдьыттарбытыгар бэйэбит бырайыактарбытын билиһиннэрдибит.

Артем Иванов, «На вахту» бырайыак салайааччытын солбуйааччы:

— Биһиги бу бырайыак нөҥүө олохтоох ыччаттарбытыгар бырамыысыланнаска уонна оҥорон таһаарыы эйгэтигэр үлэ булан биэрэбит. Атыттартан уратыбыт диэн, үлэ көрдөөччүнү үлэтигэр тиийиэр диэри тугун барытын оҥорон, көрдөрөн, ыйан-кэрдэн биэрэбит. Идэтэ суох да буоллаҕына, ол киһи баҕарарынан үөрэттэрэн, үлэтигэр тиийиэр диэри «дорожнай карта» оҥорон биэрэбит. 15000 киһилээх баазалаахпыт. Саха сирин үрдүнэн 34 цифровой филиаллаахпыт. Бүгүҥҥү туругунан 1800-н тахса киһини үлэнэн хааччыйдыбыт.

Владимир Бехтюев, «Сахадрон» хампаанньа генеральнай дириэктэрэ:

— Биһиги сыалбыт-сорукпут диэн тыа хаһаайыстыбатыттан саҕалаан логистикаҕа тиийэ туһалаах дроннары оҥоруу буолар. Холобур, хотугу улуустар сайын суоллара суох, онно дронунан таһаҕаһы тириэрдиэхпитин сөп. 80 км иһинэн биһиги дроннарбыт, эмтэри, кыра маллары тиэрдиэхтэрин сөп. Биһиги дроннарбытын сайыннарарбытыгар, хас даҕаны хайысханан үлэлиирбитигэр көрөн барда. Инники былааҥҥа дроннарбытын сайыннаран, ыйга 200 дрону араас хайысханан оҥорорго, күүстээхтик үлэлээн бу соругу ситиһэр баҕалаахпыт.