Хаартыска: Саха сиринээҕи ЫБММ пресс-сулууспата
РФ Гражданскай оборуона дьыалаларыгар, ыксаллаах быһыыны-майгыны уонна айылҕа иэдээнин содулларын туоратыыга миниистирэ Нам улууһун Хатырык нэһилиэгин олохтоохторун көрүстэ, быстах кэмҥэ олорор пууннарга сылдьан эвакуацияламмыт дьон олорор усулуобуйаларын тус бэйэтинэн сыаналаата уонна ыйытыктарга хоруйдаата.
Билигин Хатырыкка быстах кэмҥэ олорор пууҥҥа 154 киһи, ол иһигэр 33 оҕо баар. Эмсэҕэлээбиттэр иһэр уунан, итии аһылыгынан уонна бастакы наадалаах малларын толору хааччылыннылар. Нам улууһугар барыта 9 пуун тэриллибит. Эрдэ улуустан 2 тыһ. тахса киһи эвакуацияламмыта биллэр.
«Быстах кэмҥэ олорор пууннарга сөптөөх усулуобуйа барыта баар. Барыта олус үчүгэйдик тэриллибит. Нэһилиэньэ толору уонна суһал иһитиннэриилэри истэ-билэ олорор. Миэстэтигэр олохтоохторго кэмпэнсээссийэ төлөбүрдэригэр докумуоннары толорууга көмөлөһөллөр. Судаарыстыба өтүттэн көмө толору кээмэйинэн оҥоһуллуоҕа. Оробуочай хамыыһыйалар эмсэҕэлээбит эбийиэктэр туруктарын сыаналыахтара», — диэтэ РФ Гражданскай оборуона дьыалаларыгар, ыксаллаах быһыыны-майгыны уонна айылҕа иэдээнин содулларын туоратыыга миниистир Александр Куренков.
Итини сэргэ миниистир Хатырыкка аадырыстаах көмөнү оҥоруу хаамыытын бэрэбиэркэлээтэ, уу ылбыт саҥа тутуллубут икки мэндиэмэннээх дьиэҕэ олорор элбэх оҕолоох Кутуковтар дьиэ кэргэттэригэр сырытта. Владимир уонна Ирина Кутуковтар уон оҕолоохтор. Александр Куренков дьиэ кэргэттэргэ бытовой тиэхиньикэ атыылаһыыга сэртипикээт туттарда, оҕолорго кинигэ бэлэхтээтэ уонна минньигэс аһынан күндүлээтэ. Ону сэргэ Ил Дархан уонна миниистир биэнсийэлээх Васильевтар дьиэ кэргэттэригэр сырыттылар. Кинилэргэ эмиэ көмө туттардылар.
«Нэһилиэнньэ кыһалҕата тус биирдиилэринэн көрүллүөхтээх. Көмө оҥорууга көрдөһүүлэр бары көрүллүөхтээхтэр, нэһилиэнньэ манна ыарахаттары көрсүө суохтаах. Элбэх оҕолоохторго, биэнсийэлээхтэргэ уонна инбэлииттэргэ ураты болҕомто уурулуохтаах», — диэн бэлиэтээтэ биэдэмистибэ баһылыга.
Ону сэргэ кини чөлүгэр түһэрэр үлэни ыытарга ититэр «пушкалар», дизельнэй генератордар наадаларын суһаллык суоттуурга сорудахтаата диэн Саха сиринэҕи ЫБММ пресс-сулууспата суруйар.
«Бары түмсэн, тэрээһиннээхтик үөскээбит кыһалҕалары суһаллык туоратарга ыҥырабын. Биһиги наадалаах оборудованиены ыытарга, резервэни туһанарга бэлэммит. Быыһааччылар төһө наада буоларынан үлэлиэхтэрэ. Икки күн устата бары наадалаах оборудованиелар тиэрдиллиэхтэрэ», — диэн Александр Куренков түмүктээтэ.
«Суһаллык айан суолларын, уот уонна гаас ситимин чөлүгэр түһэрэр үлэлэр ыытыллалларыгар, олохтоохторго кэмпэнсээссийэ төлөбүрдэри саҕалыырга бары дьаһаллар бэрилиннилэр. Сүтэрбит докумуоннары чөлүгэр түһэрэргэ туох наада буоларынан көмөлөһүөхпүт. Эмсэҕэлээбит нэһилиэк оҕолоругар сайыҥҥы сынньалаҥ лааҕырдара тэриллиэхтэрэ. Ким да көмөтө суох хаалыа суоҕа», — диэтэ Айсен Николаев.
Бүгүн, ахсынньы 21 күнүгэр, өрөбүллээҕи Оһуокайбытыгар Эҥсиэли түмсүүтүттэн инники кэскиллэрбит, ыччаттар киирэн алгыстаах Оһуокай түһүлгэтин…
Оо, улуу көстүү! Очуос таас үрдүттэн харах ыларынан улуу өрүс иэнэ нэлэһийэр, халлааны кытта силбэһэн,…
2023 сыллаахха Былатыан Ойуунускай аатынан Саха тыйаатырыгар үлэлии кэлбит кэнники көлүөнэ “щепкинэцтэри” көрөөччүлэр хайыы үйэ…
Киһи аймах туой иһити неолит кэмиттэн, саҥа таас үйэттэн оҥостор, туттар буолбут. Саха омук даҕаны…
2021 сыллаахха түөрт оҕолоох Даниловтар дьиэ кэргэн Уһук Илиҥҥи ипотека бырагырааматыгар киирсэн уһаайба атыыласпыттара, «Килбиэнстрой»…
Хаһыаппыт бүгүҥҥү ыалдьыта, дьоруойдуу быһыы, бойобуой доҕордоһуу диэн тугун бэркэ билэр, биһиги биир идэлээхпит, кэллиэгэбит,…