Саха сиригэр саахалланар туруктаах эргэ дьиэттэн 20 тыһ. тахса киһи көһөрүлүннэ

Саха сирин үрдүнэн барыта 374 тыһ. кв миэтэрэ саахалланар туруктаах эргэ дьиэ көтүрүллүбүт. Быйыл сыл бүтүөр диэри 5000-тан тахса киһи саҥа дьиэҕэ малааһын остуолун тэрийиэҕэ.

«Олорор дьиэ уонна куорат эйгэтэ» диэн национальнай бырайыагы дойдубут Бэрэсидьиэнэ Владимир Путин көҕүлээбитэ уонна билигин өрөспүүбүлүкэбитигэр биир тумус тутуллар бырайыагынан буолар. Саха сиригэр бу бырагырааманан 1  мөл. тахса кв м иэннээх саҥа дьиэ тутуллуоҕа. Бу дойду үрдүнэн саамай улахан былаанынан буолар. Билигин  сэлиэнньэлэргэ уонна куораттарга элбэх кыбартыыралаах уонунан ааҕыллар дьиэ үлэҕэ киирэрэ махталлаах дьыала. Онон билигин, төһө кыалларынан, бырагырааманы олоххо киллэриигэ өссө кыһаллыах тустаахпыт, дьон олорор усулуобуйаларын тупсарыахтаахпыт», — диэн Айсен Николаев туох-ханнык сыал-сорук турарын быһаарбыта.

Санатар буоллахха, 2022 сылга  32 муниципальнай тэриллиигэ барыта элбэх кыбартыыралаах 129 дьиэ  тутулла турар. Бу — барыта 183 тыһ. кв миэтэрэҕэ тэҥнэһэр уонна 10738 киһи олорор усулуобуйатын тупсарыаҕа. Итини тэҥэ, кэлэр сылга 17 муниципальнай тэриллиигэ 53 дьиэ үлэҕэ киириэҕэ. Барыта 5232 киһи саҥа дьиэнэн хааччыллыаҕа. Дьокуускай куоракка билиҥҥи туругунан элбэх кыбартыыралаах 10 дьиэ тутуллар. Онон киин куоракка  2016 киһи олорор усулуобуйатын тупсарыаҕа. Кэлиҥҥи кэмҥэ хоту улуустарга болҕомто ууруллар. Ол курдук, 2020-2022 сылларга Анаабыр, Үөһээ Халыма, Дьааҥы, Эдьигээн, Өлөөн улуустарыгар элбэх кыбартыыралаах 15 дьиэ тутулунна. Барыта 777 киһи саҥа кыбартыыраларынан хааччылынна. Билигин Абый, Аллайыаха, Анаабыр, Үөһээ Халыма, Дьааҥы, Эдьигээн, Муома, Өлөөн, Орто Халыма, Эбээн Бытантай улуустарыгар 18 дьиэни тутуу барар, барыта 400 киһи олорор усулуобуйатын тупсарыаҕа.

Онон 2022 сыл бүтүүтэ Саха сирин үрдүнэн тустаах бырагыраама чэрчитинэн 25690 киһи эргэ дьиэттэн саҥаҕа көһүөҕэ. 416,7 тыһ. кв м иэннээх эргэ дьиэ көтүрүллүөҕэ.