Саха сиригэр сайыҥҥы сынньалаҥҥарыгар 3 тыһыынча кэриҥэ сааһын ситэ илик оҕону  үлэлэтиэхтэрэ

Өрөспүүбүлүкэҕэ саастарын ситэ илик оҕолор дьарыктаах буолууларыгар болҕомто ууруллар. Бу туһунан өрөспүүбүлүкэ Бырабыыталыстыбатын Бэрэссэдээтэлин солбуйааччы Ольга  Балабкина иһитиннэрдэ.

“Быйыл сайын оҕолор сынньалаҥнарын куттала суох аһарыылара уонна дьарыктаах буолуулара судаарыстыба сүрүн хайысхалартан биирдэстэринэн буолар. Сайын 3 тыһыынча кэриҥэ оҕону үлэҕэ киллэриэхтэрэ”, — диэтэ Ольга Балабкина. Оҕоҕо хамнаһын сэргэ 6 тыһыынчаттан тахса солкуобай кээмэйдээх ыйдааҕы матырыйаалынай төлөбүр оҥоһуллар. Үлэҕэ киирэргэ олорор сирдэринэн Дьарыктаах буолуу кииниттэн ыйыталаһыахтаахтар.

Бэс ыйын 5 күнүнээҕи туругунан, Нэһилиэнньэ дьарыктаах буолуутун судаарыстбаннай кэмитиэтин нөҥүө  сааһын ситэ илик 186 оҕону үлэҕэ киллэрбиттэр. Оҕолор тэрилтэлэри сэргэ табаны иитэр хаһаайыстыбаларга уонна устудьуоннар этэрээттэригэр үлэлиэхтэрин сөп. Саха сирин Тутар этэрээттэрэ 14-тэн 17 диэри саастаах оҕолору Дьокуускай куораты тупсаҕай оҥорууга үлэлэтиэхтэрэ. Тутар этэрээттэргэ билигин бэс ыйын 17 күнүттэн бэс ыйын 29 күнүгэр диэри ылыахтара, ол кэннэ от ыйын 1 күнүттэн от ыйын 15 күнүгэр диэри. Күҥҥэ түөрт час үлэлиэхтээхтэр. Маннык нүөмэринэн сибээстэһиҥ: +7 914 223-02-01.

“Саха сирин сиригэр-уотугар “Эппиэтинэстээх төрөппүт туһунан” СӨ Сокуона үлэлиирин туһунан төрөппүттэргэ туһаайан этэбин. Оҕолоргут куттала суох бириэмэлэрин атааралларыгар уонна бэйэҕит өттүгүтүттэн куттал суох буолуутун хааччыйаргытыгар болҕомтону туһаайабын. Онон, бары быраабыланы тутуһуҥ уонна маннык сокуон баарын туһунан санатабыт”, — диэтэ Ольга Балабкина.

Үлэ Кодексынан оҕо үлэлиир кэмин уһуна:

• 14-тэн 15 диэри – 4 чаас,
• 15-тэн 16 диэри – 5 чаас,
• 16-тан 18 диэри – 7 чаас.

СӨ Ил Дарханын уонна Бырабыыталыстыбатын пресс-сулууспата