Саха сиригэр салгын температурата -60С кыраадыска чугаһаата

Саха сиригэр  будулҕан туманнаах, күүстээх бытарҕан тымныылар тураллар. Ахсынньы 24 күнүгэр сарсыарда Өймөкөөн улууһугар салгын температурата -60 кыраадыс бэлиэҕэ чугаһаата.

Саха сиринээҕи гидрометеосулууспата (УГМС) иһитиннэрэринэн, Дэлэҥкир сэлиэнньэтигэр сарсыарда синоптиктар -59 кыраадыһы, оттон Өймөкөөҥҥө -52 кыраадыһы бэлиэтээтилэр.

Уус Ньараҕа, Дьааҥыга, Батамайга, Бэрдьигэстээххэ, Сиэгэн Күөлгэ, Покровскайга, Кириэс Халдьаайыга 50 кыраадыстаах тымныылар тураллар. Дьокуускайга сарсыарда салгын температурата -47 кыраадыс буолла.