Саха сиригэр сэдэх «колибри» лыаҕы видеоҕа уһуллулар

Саха сиригэр улахан сэдэх лыаҕы видеоҕа уһулбуттара социальнай ситимнэринэн бу күннэргэ элбэхтик тарҕанна. Норуокка бу лыаҕы сибиирдээҕи «колибри» диэн ааттыыллар.

Бражники (лат. Sphingidae) лыахтар колибри көтөр курдук нектар хомуйаллар, сибэкки дьөрбөтүн үрдүнэн көтөн дайаллар, уһун тумчуга көтөр тумсугар маарынныыр. Бу үөнү-көйүүрү түүҥҥү лыахтар көрүҥнэригэр сыһыараллар эрээри, сырдыкка эмиэ көтөн кэлиэхтэрин сөп, онон күнүскү өттүгэр эмиэ көрүөххэ сөп. Лыахтар үгүс көрүҥнэрэ «Кыһыл кинигэҕэ» киллэриллибиттэрэ. Саха сиригэр сэдэхтик көстөр.

Бу иннинэ маннык лыаҕы Уус Маайа оройуонун олохтоохторо бэлиэтээбиттэр. Лыах олохтоохтор петуния сибэккилэрин үрдүнэн көтө сылдьарын хаартыскаҕа түһэрбиттэрэ.