Саха сиригэр социальнай хайысха күүһүрдүллэр буолла

Бүгүн Ил Дархан Айсен Николаев сарсырдааҥҥы планерка-мунньахха Георгий Степановы СӨ Бырабыыталыстыбатын бэрэссэдээтэлин солбуйааччытын э.т. анаабытын туһунан иһитиннэрдэ. 

Георгий Степанов социальнай, үлэ хайысхатын, социальнай өттүнэн көмүскэллээх буолуу, дьиэ кэргэн бэлиитикэтин, урбааны, туризмы сайыннарыы боппуруостарынан дьарыктаныаҕа. Үлэҕэ, социальнай сайдыыга уонна урбаан, туризм министиэристибэлэрин уонна нэһилиэнньэ үлэлээх буолуутун кэмитиэтин, өрөспүүбүлүкэтээҕи ЗАГС управлениетын кытта быһаччы үлэлиэҕэ.

Ил Дархан Айсен Николаев өрөспүүбүлүкэҕэ аҕыйах кэм иһигэр эрэгийиэни салайыыга саҥа ньымалар киирбиттэрин туһунан эттэ. Бу, биллэн турар,  эрэгийиэн таһымыгар сөптөөх быһаарыныылары ылыыга көдьүүстээҕэ этилиннэ.

Ил Дархан Бырабыыталыстыба бэрэссэдээтэлин солбуйааччылара мантан инньэ ханнык хайысхалары сүрүннүөхтээхтэрин туһунан эттэ.

Бырабыыталыстыба бэрэссэдээтэлин солбуйааччы Ольга Балабкина салгыы  Доруобуйа харыстыбылын  уонна ыччат бэлиитикэтин министиэристибэлэрин үүннүө-тэһиинниэ. Бырабыыталыстыба бэрэссэдээтэлин солбуйааччы Михаил Никифоров  салгыы Арктика уонна Хотугу норуоттар дьыалаларыгар уонна тыа хаһаайыстыбатын министиэристибэлэрин кытта үлэлиэҕэ. Ону тэҥэ, Экология уонна айылҕаны туһаныыга министиэристибэтэ эбиллэн биэрдэ.  Бу хайысханан Бырабыыталыстыба бэрэссэдээтэлин бастакы солбуйааччы Дмитрий Садовников эмиэ дьарыктаныаҕа.

Бырабыыталыстыба бэрэссэдээтэлин бастакы солбуйааччы Кирилл Бычков Өлүөнэ муостатын  бырайыагын уонна тутуутун боппуруостарынан дьарыктаныаҕа. СӨ Бырабыыталыстыбатын бэрэссэдээтэлэ Андрея Тарасенко уонна бэрэссэдээтэли солбуйааччы Сергей Местников блоктара оннунан хааллылар.