Саха сиригэр социальнай көмүскэл исписэлиистэрин сүлүөтэ

Саха сирин социальнай көмүскэлин эдэр исписэлиистэрин кытта үөрэх сүлүөтүн иитинэн, бу  салаа фундаментальнай сыаннастарын дьүүллэстилэр.

Сүлүөт кыттыылаахтарыгар уопсай корпоративнай компетенциялар тустарынан СӨ үлэҕэ уонна социальнай сайдыыга миниистирэ Елена Волкова кэпсээтэ.  Кини хас биирдии үлэһит министиэристибэ миссиятын уонна сыаннастарын өйдүүрүн, суолтатын тоһоҕолоон бэлиэтээтэ, ити көдьүүстээх үлэҕэ уонна уопсай сыаллары ситиһэргэ бигэ тирэх буоларын бэлиэтээтэ.

—Хас биирдии исписэлиис, дуоһунаһыттан тутулуга суох, СӨ нэһилиэнньэтин олоҕун хаачыстыбатын үрдэтэр уопсай сыаллаах-соруктаах биир кэлим хамаанда чилиэнэ буолар, — диэтэ миниистир.

Тэрээһин кэмигэр министиэристибэ корпоративнай култууратын сүрүн көрүүлэрэ дьүүллэһилиннилэр, ол курдук килийиэни туһаайан үлэлээһиҥҥэ, профессионализмҥа, эппиэтинэстээх буолууга, инновационнай уонна хамаанданан үлэлээһин курдук сүрүн өрүттэр көрүлүннүлэр.

Миниистир эдэр исписэлиистэри министиэристибэни сайыннарыыга, саҥа, сонун сүүрээни толкуйдааһыҥҥа, үлэни тупсарыыга уонна үлэ көдьүүһүн үрдэтиигэ туһуламмыт саҥа идиэйэлэри, этиилэри толкуйдааһыҥҥа, киллэриигэ ыҥырда. Кини эдэр исписэлиистэр саҥа көрүүлэринэн Саха сирин социальнай эйгэтин сайдыытыгар улахан кылааты киллэрэр кыахтаахтарыгар эрэнэрин биллэрдэ.

Елена Волкова салааны сайыннарарга, карьераны оҥосторго уонна профессиональнай сайдыы кыахтарыгар сыһыаннаах эдэр исписэлиистэр ыйытыыларыгар хоруйдаата.

Кини министиэристибэ талааннаах исписэлиистэри тардарга, көҕүлээһиннэрин өйүүргэ уонна профессиональнай үүнүүгэ-сайдыыга усулуобуйаны тэрийэргэ бэлэмин бэлиэтээтэ.

Сиһилии: https://www.sakha.gov.ru/news/8282

СӨ Ил Дарханын уонна Бырабыыталыстыбатын пресс-сулууспата