Саха сиригэр соҕотох умайа турар ойуур баһаарын умуллардылар

Ааспыт сууккаҕа Ленскэй оройуоҥҥа 3 га иэннээх ойуур баһаара көһүннэ. Бу туһунан брифинг кэмигэр СӨ Экологияҕа, айылҕаны туһаныыга уонна ойуур хаһаайыстыбатыгар миниистирин солбуйааччыта Андрей Коноплев иһитиннэрдэ.

Уоту сотору кэминэн умуллараллара күүтүллэр, ол үлэҕэ 25 киһи уонна 6  тиэхиньикэ тардылынна. Ааспыт суукка устата баһаарынайдар Өлүөхүмэ оройуонугар 305 га иэннээх биир ойуур баһаарын умуллардылар.

Санаттахха, бэс ыйын 5 күнүттэн СӨ Ил Дарханын Ыйааҕынан өрөспүүбүлүкэҕэ баһаартан сэрэхтээх буолуу ураты эрэсиимэ олохтоммута. Ону таһынан, Дьааҥы, Өлүөхүмэ, Эбээн-Бытантай оройуоннарыгар, итиэннэ Жатай куораттааҕы уокурукка уонна Дьокуускай куоракка ураты баһаарынай эрэсиимнэр үлэлииллэр.

Баһаартан сэрэхтээх буолуу кэмэ саҕаланыаҕыттан айылҕа баһаардарын таһаарбыт 55 буруйдаах быһаарылынна, ойуурга баһаартан сэрэхтээх буолуу быраабылатын кэһии иһин 118 боротокуол оҥоһулунна.

Айылҕа баһаарын көрдөххүтүнэ, Ойуур хаһаайыстыбатын эрэгийиэннээҕи диспетчерскэй сулууспатыгар 7-4112-44-74-76 нүөмэргэ биллэриэххэ сөп. Ону таһынан ойуур харыстабылын биир кэлим нүөмэригэр 8-800-100-94-00 эрийэҕит.