Саха сиригэр суукка иһигэр 2,2 га иэннээх икки ойуур баһаара умуруорулунна

Ааспыт сууккаҕа Саха сиригэр уопсайа 2,2 га иэннээх икки ойуур баһаара умуруорулунна. Атырдьах ыйын 27 күнүн сарсыардатыгар өрөспүүбүлүкэҕэ 29 баһаар умайа турара билиннэ.

Бу туһунан сэрэдэҕэ суһал ыстаапка иһитиннэрдилэр. Ойуур уотун 523 киһи умуруорар, 19 тиэхиньикэ тардылынна. 11 259,2 га иэннээх ойуур баһаардара Үөһээ Дьааҥы, Бүлүү, Горнай, Эдьигээн, Ленскэй, Мииринэй, Өлүөхүмэ, Өлөөн, Уус Алдан, Хаҥалас, Орто Халыма, Томпо уонна Чурапчы улуустарыгар умайа тураллар.

СӨ Ил Дарханын Ыйааҕынан бэс ыйын 5 күнүттэн өрөспүүбүлүкэҕэ ойуур баһаарыттан сэрэхтээх буолуу эрэсиимэ олохтоммута.Ону таһынан ураты баһаартан сэрэхтээх буолуу эрэсиимнэр Өлүөхүмэ, Чурапчы, Эбээн-Бытантай улуустарыгар уонна Жатайга үлэлииллэр. Мииринэй улууһугар тыаҕа ыксаллаах быһыы-майгы эрэсиимэ киллэрилиннэ.