Саха сиригэр суукка иһигэр икки киһи өлүүлээх суол быһылаана тахсыбыт

Саха сиригэр суукка иһигэр 6 буруйу оҥоруу тахсыбыта бэлиэтэммит. 

Дьокуускайга, Мэҥэ Хаҥаласка уонна Уус Маайаҕа түөкүттэр олохтоохтортон  5,5 мөл. солк. кэриҥэ харчыны уорбуттар (схемата — «инвестиция», «суотабай оператора»,  «ФСБ, Киин баан, Росфинмониторинг үлэһиттэрэ»).

Киин куоракка уоруу тахсыбыт, сокуоннайа суох наркотигы эргинии тохтотуллубут.

Ленскайга Нүүйэ сэлиэнньэтиттэн 6 км тэйиччи 1969 с.т. суоппар вездеходунан айааннаан иһэн түҥнэстибит. Саахал түмүгэр вездеход 1984 с.т. пассажир ылбыт эчэйиилэриттэн миэстэтигэр суорума суолламмыт. Суоппар уонна иккис пассажир балыыһаҕа киирбиттэр.

Алдан, Нерюнгри оройуоннарыгар үс суол быһылаана регистрацияламмыт, манна 3 киһи эчэйбит, 1 киһи суорума суолламмыт. Ол курдук, Нерюнгри оройуонугар «Лена» федеральнай айан суол 382 км  2004 с.т. суоппар  «Ниссан Куб» массыынанан утары суолга тахсан биэрбит уонна «УАЗ» массыынаны кытта харсыспыт. Саахал түмүгэр «Ниссан Куб» суоппара миэстэтигэр өлбүт, «УАЗ» массыына суоппара балыыһаламмыт.

Суукка иһигэр Саха сиригэр 4 итирик туруктаах суоппар тутуллубут.