Саха сиригэр суукка устата 375 тыһ. га иэннээх 15 баһаары умуруорбуттар

Ааспыт сууккаҕа Саха сиригэр 375 тыһ. га тахса иэннээх 15 баһаары умуруорбуттар. Ону тэҥэ, 54,6 тыһ. га тахса иэннээх уон баһаары бохсорбуттар. Бу туһунан атырдьах ыйын 2 күнүгэр РФ ЫБММ өрөспүүбүлүкэтээҕи управлениетын пресс-сулууспата иһитиннэрэр.

Авиалесоохрана суһал чахчытынан, эрэгийиэҥҥэ 95 айылҕа баһаара баар. Суукка устата баһаары умуруорууга 1718 киһи, 141 тиэхиньикэ үлэлээбит. Сүрүн күүһү Өлүөхүмэ улууһун Куду Күөл, Тээнэ, Хоро, Чапаево сэлиэнньэлэрин, Үөһээ Бүлүү улууһун Өргүөт, Дьааҥы улууһун Сайдыы, Ленскэй улууһун  Инньэли, Сунтаар улууһун Мэлэкэ нэһилиэнньэлээх пууннарын бөҕөргөтүүгэ бырахпыттар.

“Нэһилиэнньэлээх пууҥҥа чугаһыыр кутталлаах аҕыс баһаары таһынан, биэдэмэстибэ хонтуруолугар Дьиикимдэ сэлиэнньэтин аттыгар “Өлүөхүмэ” айылҕа бобуулаах сиригэр түөрт баһаары хонтуруолга тутабыт. Арассыыйа ЫБММ аэромобильнай баһаарынайдарын бөлөҕө Куду, Өргүөт, Чапаево уонна Сайдыы сэлиэнньэлэрин аттыгар баар баһаардары умуруорууга сыһыарыллыбыта. Биэдэмэстибэ авиацията суукка устата Өлүөхүмэ улууһугар үлэлээтэ”—диэн РФ ЫБММ управлениетын начаалынньыга Павел Гарин этэр. Кини иһитиннэрбитинэн, бээтинсэҕэ ЫБММ авиацията Үөһээ Бүлүү уонна Өлүөхүмэ улуустарыгар үлэлиэҕэ.

Атырдьах ыйын 1 күнүнээҕи туругунан Саха сирин нэһилиэнньэлээх пууннарыгар салгыҥҥа химическэй бэссэстибэ үрдээһинэ бэлиэтэммэтэх. Буруо Өлүөхүмэ уонна Үөһээ Бүлүү улуустарын биэс нэһилиэнньэлээх пуунугар баар.

СИА.