Саха сиригэр сууккаҕа 10 ойуур баһаарын умуруордулар

Ааспыт сууккаҕа Үөһээ Дьааҥы, Өлүөхүмэ, Хаҥалас, Нам, Усуйаана, Уус Маайа, Томпо улуустарыгар 2 067,5 га иэннээх сиргэ барыта 10 ойуур баһаара умуруорулунна.

Ол иһигэр Мэҥэ Хаҥалас Даркылааҕар уот күөдьүйбүтүн тохтоттулар. Ону кытта Булуҥ улууһугар  1 ойуур баһаара умуруорулунна. Бу туһунан сарсыарда субуотаҕа, бэс ыйын 8 күнүгэр, Саха сирин сүрүн лесничэйэ Андрей Коноплев иһитиннэрдэ.

Көтөр аалынан, космическай кэтээн көрүүлэр түмүгэр ааспыт сууккаҕа 6 ойуур баһаара Үөһээ Дьааҥы, Нерюнгри, Өлүөхүмэ, Кэбээйи улуустарыгар 3 141,5 га иэннээх сиргэ ойуур баһаара турбута бэлиэтэннэ.

Бэс ыйын 8 күнүнээҕи туругунан Саха сиригэр 28 ойуур баһаара турбута регистрацияланна. Баһаарынай сезон саҕаланыаҕыттан барыта 92 ойуур уонна 26 ландшафтнай ойуур баһаара тахсыбыта бэлиэтэммит.

Баһаары бохсууга 497  баһаарынай уонна 20 тиэхиньикэ тардылынна.  Баһаары суһаллык бохсорго бары  сөптөөх дьаһаллар ылыллаллар. Кэбээйи улууһун Мастааҕар чугаһаабыт ойуур баһаара ураты хонтуруолга турар. 70 га иэннээх сиргэ ойуур баһаарын 56 киһи уонна 3 тиэхиньикэ умуруоруллар. Нэһилиэнньэҕэ быһаччы куттал суох.

Росгидромет АН26 уонна ЯК40 көтөр ааллара Уус Маайа, Томпо, Таатта, Чурапчы, Амма, Горнай уонна Хаҥалас улуустарыгар көтүүгэ бэлэмнэр. Өлүөхүмэ улууһугар ыксаллаах-быһыы эрэсиимэ уонна 18 муниципальнай улуустарынан ураты баһаарынай эрэсиимэ салгыы үлэлиир.