Саха сиригэр сыана үрдээһинэ дойду үрдүнэн көрдөрүүнү куоһарда

Росстат дааннайдарынан, Саха сиригэр бу сыл от ыйыгар сыана бэс ыйын кытта тэҥнээтэххэ 1,06% үрдээбит, диэн Арассыыйа Национальнай баанын Саха сиринээҕи салаатын пресс-сулууспата иһитиннэрэр.

Сыллааҕы инфляция түөрт ый бытаарыы кэнниттэн түргэтээн, 9,62% тэҥнэстэ. Бу дойду үрдүнэн орто көрдөрүүттэн (8,79%) үрдүк.

От ыйыгар өҥөлөр сыаналара ордук биллэрдик үрдээтилэр. Ас-үөл уонна аһылыкка киирбэт табаардар сыаналара биир ый иһигэр сыыйа эбиллибиттэр. 12 ый устата аһылыкка киирбэт табаардар сыаналара бүтүннүү табаардар сыаналарын үрдээһиниттэн быдан намыһахтык, оттон ас-үөл уонна өҥөлөр киэннэрэ үрдүктүк үрдээбит. Дьыл кэмин уларыйыытын аахпатахха, от ыйыгар сыана үрдээһинэ түргэтээбит. Сүрүн төрүөтэ — хомунаалынай өҥөлөр тарыыптарын 4%-тан тахса индексациялааһын.