Саха сиригэр сыл саҕаланыаҕыттан 5000 кэриҥэ булт саата былдьаммыт

Сыл саҕаланыаҕыттан быраабы араҥаччылыыр уорганнарынан булт саатын бас билээччилэригэр 19 000 кэриҥэ бэрэбиэркэ ыытыллыбыт, араас кэһиилэр иһин 4967 саа уонна 6644 устуука ботуруон былдьаммыт, 1913 административнай боротокуол оҥоһуллубут, диэн Росгвардия эрэгийиэннээҕи управлениетын пресс-сулууспата иһитиннэрэр.

Холобур, Хаҥалас улууһугар Росгвардия лицензияны-көҥүлү биэрэр үлэтин иниспиэктэрдэрэ бултаан кэлэн баран, бас билээччи гарааска хаалларбыт булт саатын уонна ботуруонары  уура сытарын булбуттар. Гражданин административнай эппиэтинэскэ тардыллыбыт, саата уонна ботуруоннара былдьаннылар.

Ону таһынан, Росгвардия дааннайынан, 144 бас билээччи сааны хос регистрациялыыр болдьоҕун кэспиттэр. Харчынан наҕараада иһин гражданнар уопсайа 3 мөл. 806 тыһ. солкуобай суумаҕа 633 регистрациялаах сааны туттарбыттар. Быйыл Росгвардия управлениетынан байыаннай дьайыы наадатыгар байыаннай чаастарга 675 саа бэрилиннэ.