Саха сиригэр сыл саҕаланыаҕыттан 600 тыһ.кв.м. дьиэ үлэҕэ киирдэ

Бу сыл саҕаланыаҕыттан Саха сиригэр 600-чэ тыһыынча квадратнай миэтэрэ дьиэ үлэҕэ киирдэ. Дьыл бүтүүтэ бу көрдөрүүнү 690 тыһыынча квадратнай миэтэрэҕэ тиэрдэр сорук турар. Бу туһунан СӨ Тутуутун миниистирэ Виктор Романов «Якутия 24» телеханаалга «Актуальное интервью» биэриигэ иһитиннэрдэ.

«Өрөспүүбүлүкэҕэ кэтэх дьиэ тутуута көхтөөхтүк барар. 428 тыһыынчаттан тахса квадратнай миэтэрэ кэтэх дьиэ тутулунна. Саха сиригэр элбэх кыбартыыралаах уонна кэтэх дьиэлэри тутуу Арассыыйа Бэрэсидьиэнэ Владимир Путин көҕүлээбит «Олоххо аналлаах инфраструктура» национальнай бырайыагын «Дьиэ-уот» эрэгийиэннээҕи бырайыагын өйөбүлүнэн ыытыллар», — диэн миниистир чопчулаата.

Виктор Романов бэлиэтээбитинэн, эрэгийиэҥҥэ сири-уоту комплекснайдык сайыннарыы 16 бырайыага олоххо киирэр. Кини 2021 сыллаахтан үлэлиир СУКС ньымата олорор дьиэ тутуутун уонна инфраструктураны саҥардан, дьон олороругар табыгастаах усулуобуйаны тэрийэрин тоһоҕолоон эттэ.

«2030 сылга диэри Саха сиригэр 1,5 мөлүйүөнтэн тахса квадратнай миэтэрэ саҥа дьиэни үлэҕэ киллэрэр былааннаахпыт. Бу хайысхаҕа СУКС – көннөрү ньыма буолбатах, сайдыы дьиҥнээх сүрүн күүһэ буолар. Ону таһынан, эбии 1 мөлүйүөҥҥэ чугаһыыр кв. миэтэрэ дьиэлээх саҥа СУКС бырайыактарын бигэргэтии боппуруоһа үлэлэһиллэр. Сири-уоту комплекснайдык сайыннарыы ньымата өрөспүүбүлүкэҕэ тутуллар саҥа дьиэ 60-70% хааччыйыаҕа. Бу көннөрү квадратнай миэтэрэлэр буолбакка, олоххо дьиҥнээхтии табыгастаах эйгэ буолуохтара», — диэтэ Виктор Романов. Сири-уоту тутууга аныгылыы сыһыан холобурунан миниистир Дьокуускай куорат «Спортивнай» түөлбэҕэ бырайыактааһын уонна тутуу уопутун аҕалла.

«Манна дьиэ таһынан оскуолалар, оҕо уһуйааннара, поликлиникалар, успуорт эбийиэктэрэ уонна урбаан эйгэлэрэ тутуллаллар. Түөлбэ уопсай иэнэ 53,1 гектартан тахса. 90 тыһыынча кв. миэтэрэ иэннээх 160 эргэ уонна саахалланар туруктаах элбэх кыбартыыралаах дьиэттэн дьону көһөрүү былааннанар. Эргэ мас дьиэлэр оннуларыгар уопсайа 327 тыһыынча кв. миэтэрэ иэннээх 46 элбэх кыбартыыралаах дьиэни тутар былааннаахпыт. Саҥа дьиэлэргэ 13,5 тыһыынчаттан тахса киһи олоруоҕа. Бүгүҥҥү күҥҥэ СУКС чэрчитинэн 11 эргэ дьиэттэн олохтоохтору көһөрдүбүт. «Спортивнай» уопутун, ордук инфраструктураны былааннааһыҥҥа уонна «күөх» стандарттары туһаныыга, атын бырайыактарга тарҕатабыт. Саха сиригэр олоххо киирэр сири-уоту комплекснайдык сайыннарыы бырайыактара эрэгийиэҥҥэ 138 тыһыынчаттан тахса кв. миэтэрэ иэннээх 288 саахалланар туруктаах элбэх кыбартыыралаах дьиэни көтүрэргэ кыах биэриэхтэрэ», — диэн Саха сирин тутуутун миниистирэ Виктор Романов иһитиннэрдэ.

Санатан эттэххэ, кэлиҥҥи уон сыл иһигэр Саха сиригэр 6,5 мөл. тахса квадратнай миэтэрэ дьиэ тутуллубута. 2024 сыл түмүгүнэн устуоруйаҕа рекорднай көрдөрүү – 752 тыһыынча квадратнай миэтэрэ ситиһиллибитэ. Өрөспүүбүлүкэ Уһук Илиҥҥэ дьиэни үлэҕэ киллэрии кээмэйинэн үгэс быһыытынан бастыҥ үһүккэ киирэр.