Саха сиригэр Сүрэх-тымыр киинин сүбэлиир киинэ 3,2 тыһыынчаттан тахса теле-мэдиссиинэ сүбэтин биэрдэ

2025 сылга Өрөспүүбүлүкэтээҕи 1 №-дээх балыыһа – Мэдиссиинэ Национальнай киинин Сүрэх-тымыр киинин Биир кэлим тэйиччиттэн сүбэлиир киинэ 3294 сүбэни биэрдэ.

“Итинтэн 60 % тахсата сүрэх-тымыр суһал ыарыытын кытта сибээстээх. Бу теле-мэдиссиинэ маннык ыарыһахтарга суһал көмөнү оҥорорго тутаах оролун көрдөрөр”, — диэтилэр Доруобуйа харыстабылын министиэристибэтигэр. Бу киин оҥорор өҥөтүгэр эмтээһини-диагностааһыны эрэ буолбакка, ыарахан туруктаах пациеннары мэдиссиинискэй эвакуациялааһын боппуруоһун быһаараллар, ону тэҥэ уустук клиникалаах түгэннэри быһаарыыга федеральнай тэрилтэлэри кытта үлэлэһэллэр. Бу туһунан sakha.gov.ru  суруйар.

Тустаах министиэристибэ штаты таһынан сүрүн кардиолога Елена Кылбанова этэринэн, теле-мэдиссиинэ  көмөтүнэн сүбэлээһин 80 быр. кэриҥин оройуон киин балыыһаларын кытта ыыталлар. Быйыл 9 ый түмүгүнэн оройуон балыыһаларыттан 2584 сайаапка киирбит, о.и. Арктикаттан — 388.

Сүбэлиир киин оройуон балыыһаларын уонна тымыр ыарыыларын бастакы сүһүөх отделениеларын быраастарын кытта диагноһы быһаарыыга онлайн-обходтары ыытар. Быйыл 584 оҥоһуллубут. Дойду Бэрэсидьиэнэ Владимир Путин көҕүлээбит” Уһун уонна көхтөөх олох” национальнай бырайыак “Борьба с сердечно-сосудистыми заболеваниями” бырайыага сүрэх-тымыр ыарыылаахтарга суһал уонна былааннаммыт көмөнү оҥорууга олоххо киирэр.