Саха сиригэр тас дойдуттан үлэһиттэри сыһыарыы хонтуруоллааһынын күүһүрдэллэр

Ил Дархан Айсен Николаев тохсунньу 25 күнүгэр  өрөспүүбүлүкэ быраабы араҥаччылыыр уорганнарын салайааччыларын кытта мунньах ыытта. Эрэгийиэҥҥэ уопсастыбаннай бэрээдэги көрүүнү кытта сибээстээх кэккэ боппуруостары, ону тэҥэ, үлэ миграциятын боппуруоһун көрдүлэр.

“Тастан кэлээччилэр тиэмэлэрин дойдуга уопсастыба улаханнык сэҥээрэр. Ааспыт сыл түмүгүнэн биһиги өрөспүүбүлүкэбитигэр тас дойдуттан кэлээччилэр буруйу оҥорууларын ахсаана намтаата. Ол гынан баран, бүтэһик түгэн нэһилиэнньэ болҕомтотун сытыырхатта. Дьокуускайга тохсунньу 21 күнүгэр тахсыбыт атааннаһыы бары кыттааччыларын суһаллык булбуттара, туппуттара. Боппуруоһу РФ Силиэстийэлиир кэмитиэтин бэрэссэдээтэлэ Александр Иванович Бастрыкин хонтуруоллуур. Дьыаланы тиһэҕэр диэри тиэрдиэхтэрэ уонна буруйдаахтар эппиэттиэхтэрэ”, — диэн Айсен Николаев бэлиэтээтэ.

Ил Дархан, эрэгийиэҥҥэ криминалга сыһыаннаахтар кэлбэттэрин туһугар, өрөспүүбүлүкэҕэ тас дойдуттан үлэлии кэлээччилэри хонтуруоллааһын үлэтэ күүһүрүөҕэ диэн иһитиннэрдэ.

Миграционнай сокуон быраабылата тутуһуллуутун бэрэбиэркэлиир ирдэнэрин бэлиэтээтэ. РФ олохтоохторо аатын ылбыттары бэрэбиэркэлиир ирдэнэрин эттэ, бу төһө сокуоннайын уонна РФ гражданнарын эбээһинэһин тутуһууларын.

Ону тэҥэ, куорат дьаһалтатын, өрөспүүбүлүкэ Бырабыыталыстыбатын өйөбүлүнэн тас дойдуттан кэлээччилэри үлэлэтэр үлэ биэрээччилэри бэрэбиэркэлиир ирдэнэрэ бэлиэтэннэ. Тастан кэлээччилэр Үлэ сокуонун, үлэлиир кэмнэригэр дойдуга сылдьыы быраабылатын төһө тутуһаллара. Бу тас дойдуттан кэлээччилэри үлэҕэ сыһыарар үлэ биэрээччилэргэ барыларыгар сыһыаннаах, чуолаан тутуу, атыы эйгэтигэр. Туох даҕаны кэһии тахсыбатын инниттэн кинилэри кытта сэрэтэр үлэ ыытыллыаҕа.

Айсен Николаев, атын эрэгийиэннэр уопуттара көрдөрөрүнэн, криминализацияны кытта охсуһууга ордук көдьүүстээх үлэнэн өрүү сэрэтэр үлэни ыытыы, эриэйдэлэри тэрийии буоларын иһитиннэрдэ.

“Бу буолан ааспыт түгэн, информационнай сэрии кэмигэр, атыттары сэргэ, өрөспүүбүлүкэ тас өттүттэн улахан дьайыы баарын көрдөрөр. Маны дойдуга буолбут иирсээн бигэргэтэр. Өрөспүүбүлүкэ уонна дойду тас өттүгэр олорор албын ааптардар омуктар икки ардыларынааҕы күөртээһини таһаараллар, экстремискэй лозуннары тарҕаталлар. Өрөспүүбүлүкэ Бырабыыталыстыбата, улуустар уонна бары быраабы араҥаччылыыр уорганнар сэрэтэр үлэни ыытыыны салгыыллара ирдэнэр”, — диэн Айсен Николаев эттэ.

Ил Дархан уонна Бырабыыталыстыба пресс-сулууспата.