Саха сиригэр төһө элбэх учуутал, үөрэнээччи баарый?

Саха Өрөспүүбүлүкэтин үөрэҕин уонна наукатын дааннайынан Саха сиригэр 2022 сыллаахха 620 оскуолаҕа 153 тыһыынчаттан тахса оҕо үөрэнэрэ. Бу көрдөрүү 2012 сыллааҕар 14,6 тыһыынчанан элбэх.

Оттон быйыл Саха сиригэр 16 тыһ. тахса оҕо оскуола боруогун аан маҥнай атыллаата. Өрөспүүбүлүкэҕэ быйылгы үөрэх дьылыгар барыта 634 оскуола аанын тэлэччи аста.

Бу туһунан Сахастат тэрилтэ иһитиннэрэр.

Оттон 2022 сыллаах балаҕан ыйын 20 күнүнээҕи дааннайынан орто оскуола үөрэҕин тэрилтэтигэр учуутал ахсаана 14 тыһыынча эбит. Мантан саамай элбэх 1-4 уонна бэлэмнэнии кылаастарын – 3,6 тыһыынча, нуучча тылын – 1,5 тыһыынча уонна математика – 1,2 тыһыынча учууталлара.