Саха сиригэр төрдүс уонна онтон элбэх оҕо төрөөһүнүгэр Ийэ хапытаалын ылыахтара

2025 сыл тохсунньу 1 күнүттэн төрдүс уонна онтон элбэх оҕо төрөөһүнүгэр “Дьиэ кэргэн” өрөспүүбүлүкэтээҕи хапытаалы ылыахтара. Бу туһунан Ил Дархан Айсен Николаев  “Быһа кэпсэтиигэ” иһитиннэрдэ.

Айсен Николаев эппитинэн, билиҥҥитэ бырайыагы СӨ Судаарыстыбаннай мунньаҕа (Ил Түмэн)  көрө илик. Ол гынан баран, Ийэ хапытаалын түөртэн элбэх оҕолоох ыал бары ылар бырааптаах.

«Сокуон бырайыага Ил Түмэн чугастааҕы сиэссийэтигэр, үс ааҕыыга ылыллыаҕар эрэнэбин. Онно мин илии баттыам. Өрөспүүбүлүкэбитигэр элбэх оҕолоох дьиэ кэргэн үгүс. Маннык ыаллары  туох кыалларынан, ол иһигэр үбүнэн-харчынан, өйүөххэ наада”, — диэтэ Айсен Николаев. 

Ил Дархан эрдэ өрөспүүбүлүкэ парламеныгар этиитигэр төрдүс уонна онтон элбэх оҕону төрөтөргө быһаарыммыт  дьиэ кэргэттэргэ кырдьыктаах сыһыан баар буолар кэмэ кэлбитин бэлиэтээн эппитэ. Кини кылгас кэм иһигэр тустаах сокуон барылын оҥорорго өрөспүүбүлүкэ бырабыыталыстыбатыгар сорудахтаабыта.

“Сүүс сыл оҕолоро” тус сыаллаах хапытаалы учуоттаан, 2025 сылга түөрт уонна онтон элбэх оҕолоох дьиэ кэргэттэргэ биир кэмнээх өйөбүл суумата  433 тыһыынча буолуоҕа.