Саха сиригэр Төрөөбүт тыл уонна сурук-бичик күнүн бэлиэтииллэр

Олунньу 13 күнүгэр Саха сиригэр Төрөөбүт тыл уонна сурук-бичик күнүн бэлиэтиибит. Бу күн сахалартан бастакы тыл үөрэхтээх учуонай, суругу-бичиги төрүттээбит Семен Новгородов төрөөбүт күнүгэр бэлиэтэнэр.

Бу күн өрөспүүбүлүкэ үрдүнэн дэкээдэ саҕаланар, Саха сиригэр Култуура сылыгар уонна Арассыыйаҕа РФ Бэрэсидьиэнэ В.В.Путин  биллэрбит Норуоттар сомоҕолоһууларын сылыгар анаммыт тэрээһиннэр ыытыллаллар.

«Бүгүн биһиги иннибитигэр төрөөбүт тыллары харыстыыр уонна киэҥник тарҕатар, сыыппара технологиятын үйэтигэр булгуччулаах үстүрүмүөн буолалларын ситиһэр сорук турар», — диэн Ил Дархан Айсен Николаев эҕэрдэтигэр этэр.

Төрөөбүт тыл уонна сурук-бичик дэкээдэтин үөрүүлээх арыллыыта бүгүн  Дьокуускайга Д.К.Сивцев-Суорун Омоллоон аатынан Опера уонна балет тыйаатырыгар буолуоҕа.

Дэкээдэ бырагырааматыгар — быыстапкалар, дьыктааннар, онлайн-викториналар, интеллектуальнай оонньуулар уо.д.а. тэрээһиннэр бааллар.

Сиһилии: https://www.sakha.gov.ru/news/26148