Саха сиригэр тиийинэн олоруу алын кээмэйэ үрдээтэ
![](https://sakha-sire.ru/wp-content/uploads/2023/01/0530e412e9adac388c30dc48f97e5f136c1f2983-900x596.jpg)
2023 сыл тохсунньу 1 күнүттэн Саха сиригэр тиийинэн олоруу алын кээмэйэ үрдээн, нэһилиэнньэ дууһатыгар, ортотунан, 21 706 солк. буолла диэн СӨ Үлэҕэ министиэристибэтэ иһитиннэрэр.
Үлэлиир дьоҥҥо – 23 660, биэнсийэлээхтэргэ – 18 667, оҕолорго – 22 560 солкуобайга тэҥнэстэ. Онтон зоналарынан араартаатахха:
— I зонаҕа Арктика оройуоннара киирэллэр. Манна тиийинэн олоруу алын кээмэйэ нэһилиэнньэ дууһатыгар, ортотунан, 25 396 солк., үлэлиир дьоҥҥо – 27 682, биэнсийэлээхтэргэ – 21 840, оҕолорго – 26 395 солкуобайга тэҥнэстэ.
— II зонаҕа киин оройуоннар уонна Дьокуускай куорат киирэллэр. Манна тиийинэн олоруу алын кээмэйэ нэһилиэнньэ дууһатыгар, ортотунан, 21 272 солкуобай буолла. Үлэлиир дьоҥҥо – 23 187, биэнсийэлээхтэргэ – 18 294, оҕолорго – 22 109 солкуобайга тэҥнэстэ.
2023 сылга тиийинэн олоруу алын кээмэйэ сыана үрдээһининэн сибээстээн, ураты бэрээдэгинэн, урутаан улаатыыны учуоттаан олохтонно. Инньэ гынан 2022 сыл тохсунньутун кытары тэҥнээтэххэ, 13,6 % үрдээтэ.
Санатан эттэххэ, тиийинэн олоруу алын кээмэйэ кыаммат араҥа, тиийиммэт-түгэммэт дьиэ кэргэн судаарыстыбаннай социальнай көмөҕө наадыйыытын сыаналааһыҥҥа, ону тэҥэ оҕо төрөөһүнүгэр уонна иитиитигэр ыйдааҕы босуобуйа кээмэйин итиэннэ көмө кээмэйин ааҕыыга аналлаах.
Сообщить об опечатке
Текст, который будет отправлен нашим редакторам: