Саха сиригэр тоҕус социальнай эбийиэги астылар

Саҥа сылы көрсө Саха сирин араас оройуоннарыгар биир кэмҥэ тоҕус социальнай эбийиэги астылар. Олор истэригэр айар дьиэлэр, оскуолалар, доруобуйа харыстабылын  уонна успуорт  эбийиэктэрэ бааллар.

• В. Е. Васильев аатынан Норуот айымньытын дьиэтэ Амма улууһун Соморсунугар;
•  И. Н. Касьяненко аатынан оҕо ускуустубатын дьиэтэ Алдан оройуонун Томмотугар;
• Айар дьиэ Үөһээ Бүлүү улууһун Нам нэһилиэгэр;
• Бырааттыы Боескоровтар ааттарынан Сургуулук орто оскуолата, Үөһээ Бүлүү улууһугар;
• Н.И.Кочнев аатынан орто оскуола Ньурба улууһун Ынахсыт нэһилиэгэр;
• Сунтаар улууһун киин балыыһата Сунтаар улууһун Элгээйитигэр;
• Култуура-успуорт комплекса Сунтаар улууһун Сунтаар нэһилиэгэр
• Дьиэ кэргэн  МФЦ-та Уус Алдан улууһун Бороҕонугар;
•  «Кэнчээри» уһуйаан Хаҥалас улууһун Төхтүрүгэр.

«Өрөспүүбүлүкэ олохтоохторугар үөрүүлээх күннэр биһиги иннибит хоту эрэллээхтик, ыарахаттартан чаҕыйбакка дойдуну кытта тэҥҥэ баран иһэрбитин көрдөрөр. Инникигэ эрэллээхтик биһиги олохпутун тупсарабыт»,-  диэн Саха сирин аҕа баһылыга Айсен Николаев телеграм-ханаалыгар суруйар.

«Өрөспүүбүлүкэ олохтоохторугар анаан оҥоһуллар туох барыта хаачыстыбалаах уонна усулуобуйаны тупсарар соруктаах. Саамай сүрүнэ — бу эбийиэктэр саҥа кыахтары үөскэтиэхтээхтэр.  Аныгылыы тэрилинэн хааччыйыы куорат эрэ сиригэр буолбакка, улуустарга эмиэ баар буолуохтаах. Бу бырайыак оҥорооччуларга, тутааччыларга, тустаах министиэристибэлэргэ, олохтоох бэйэни салайыныы уорганнарыгар эппиэтинэһи сүктэрэр», — диэтэ Айсен Николаев.