Саха сиригэр түөрт киһини өлөрбүт эр киһи олоҕун тухары көҥүлэ быһылынна

Саха сирин Үрдүкү суута Мииринэй олохтооҕо түөрт киһини өлөрбүтүнэн ураты эрэсиимнээх холуонньаҕа олоҕун тухары көҥүлүн быһарга бириигэбэрдээтэ. Бу туһунан СӨ Борокуратууратын пресс-сулууспата иһитиннэрэр.

«СӨ борокуруора Максим Попов Мииринэй куоратын 60 саастаах олохтооҕун холуобунай дьыалатыгар судаарыстыбаннай буруйдааһынын өйөөтө. Кини иккиттэн элбэх киһини өлөрүүгэ буруйданар.  Саха сирин Үрдүкү суута судаарыстыбаннай буруйдааччы быһаарыытын ылынан, буруйданааччы ураты эрэсиимнээх холуонньаҕа олоҕун тухары көҥүлэ быһылынна. Бириигэбэр сокуоннай күүһүгэр киирэ илик», — диэн иһитиннэриигэ этиллэр.

Саха сиринээҕи Силиэстийэлиир кэмитиэтин дааннайынан, 2023 с. алтынньы 14 күнүгэр Мииринэй куорат олохтооҕо бэйэтин даачатыгар  икки эр киһини уонна икки дьахтары саанан ытан өлөрбүт. Ылбыт эчэйиилэриттэн эмсэҕэлээччилэр миэстэтигэр суорума суолламмытар.

«Дьону өлөрүү төрүөтүнэн буруйданааччы быһаарбытынан, кини олорор даачатыгар эмсэҕэлээччилэр көҥүлэ суох малын-салын туһаммытар, аһын-үөлүн сиэбиттэр, баан каартатыттан харчытын туһаммыттар уонна төнүннэрбэтэхтэр», — диэн Саха сиринээҕи Силиэстийэлиир кэмитиэтин пресс-сулууспата эбэн иһитиннэрдэ.