Саха сиригэр тыһыынча кэриҥэ байыас уонна кинилэр дьиэ кэргэттэрэ комплекснай реабилитацияны аастылар

Ю.П. Степанов аатынан инбэлиитэри комплекснай реабилитациялыыр өрөспүүбүлүкэтээҕи социальнай-чэбдигирдэр кииҥҥэ байыаннай дьайыы кыттыылаахтарын уонна кинилэр дьиэ кэргэттэрин  реабилитациялааһын салҕанар.

Реабилитацияны барыта 493 байыас уонна кинилэр дьиэ кэргэттэриттэн 480 киһи ааста. Бу туһунан бүгүн, балаҕан ыйын 4 күнүгэр, брифиҥҥэ киин дириэктэрэ Асида Алексеева иһитиннэрдэ.

«Реабилитациялыыр киин үлэһиттэрэ байыаннай дьайыы кыттыылаахтарын уонна кинилэр дьиэ кэргэттэрин иһитиннэрэр уонна сүбэлиир-амалыыр тэрээһиннэри салгыыллар. Барыта араас биэдэмистибэлэри уонна тэрилтэлэри кытта 80-тан тахса көрсүһүү ыытылынна», – диэн Асида Алексеева бэлиэтээтэ. Ону таһынан, байыастар уонна кинилэр чугас дьонноро куттарын-сүрдэрин бөҕөргөтөргө, дууһалыын уоскуйалларыгар көмөлөһөр Арчы Дьиэтин Алгыс сиэрэ-туома ыытыллара салҕанар. Бу туһунан sakha.gov.ru иһитиннэрэр.