Саха сиригэр тылы харыстааһыҥҥа уонна сайыннарыыга бырайыактар түмүктэрин билиһиннэрдилэр

Төрөөбүт тыл уонна сурук-бичик күнүн көрсө Саха сиригэр төрөөбүт тыл уонна култуура нэһилиэстибэтин чөлүгэр түһэрии, чинчийии, сыппараҕа киллэрии үлэ түмүктэрин билиһиннэрдилэр.

Саха сиригэр судаарыстыбаннай уонна официальнай тыллары харыстааһыҥҥа уонна чөлүгэр түһэриигэ судаарыстыбаннай бырагыраама чэрчитинэн былырыын 17 бырайыак  олоххо киирбит, диэн СӨ Ил Дарханын  уонна Бырабыыталыстыбатын пресс-сулууспата иһитиннэрэр.

Биир сүрүн хайысханан Хотугу, Сибиир уонна Уһук Илин төрүт олохтоох аҕыйах ахсааннаах норуоттарын олорор сирдэринэн эспэдииссийэлэри тэрийбиттэр. СӨ Култуураҕа уонна духуобунай сайдыыга миниистирэ Афанасий Ноев тыл бэлиитикэтигэр саҥа быһаарыылар олоххо киирэллэригэр эспэдииссийэлэр  уонна научнай чинчийиилэр түмүктэрэ инникитин тыл бэлиитикэтигэр тирэх буолуохтарын бэлиэтээтэ.

«Хонуу чинчийиилэрин кэмигэр хомуллубут матырыйааллар официальнай докумуоннарга олоҕуран тыл бырагыраамаларын салгыы сайыннарарга туһаныллыахтара», — диэтэ миниистир.

ХИФУ Билимҥэ уонна инновацияҕа департаменын дириэктэрэ Нинель Малышева бэлиэтээбитинэн, научнай эспэдииссийэлэргэ сылдьан дьүкээгир уонна чукотка тылларын аан бастаан бэлиэтээбиттэр. Хомуллубут матырыйааллар научнай эргимтэлэргэ киллэриллэн, мультимедийнай бородуукталары оҥорорго — таабырыннар уонна өс хоһооннор хомуурунньугар тирэх буолуохтара.

Гуманитарнай чинчийии уонна хотугу сир аҕыйах ахсааннаах норуоттарын проблемаларын института Саха сирин араас оройуоннарыгар тыл балаһыанньатын ырыппыт, саха оҕолоро төрөөбүт тылынан үөрэтии таһымнарын кэтээн көрбүт, ону тэҥэ хотугу сир төрүт олохтоох аҕыйах ахсааннаах норуоттарын тылларын билиитин кэтээн көрүүтэ ыыппыт.

Фольклорнай-лингвистическэй эспэдииссийэни ыытыы түмүгэр туундара дьүкээгирдэрэ олорор сирдэригэр дьүкээгир тылынан  оскуола үөрэнээччилэригэр босуобуйа оҥороллор.

Ону сэргэ «Родственные языки в социальных медиа» бырайыак чэрчитинэн Норуоттар доҕордоһууларын дьиэтэ подкастары уонна этномузыкальнай тиэкистэри суруйбуттар, видео-, медиа- бырайыактары бэлэмнэммиттэр. Ресурснай киин салайааччыта Екатерина Егорова этэринэн, бэлэм бырайыактар араадьыйаҕа, «ВКонтакте» аныгы аудиоплатформаларга , «Яндекс Музыка» уонна тэрилтэ пабликатарынан тарҕаныахтара.

«Бастакы кылаас күннүгэр» бырайыагынан күннүктэр нууччалыы уонна сахалыы тылларынан тахсаллар уонна өрөспүүбүлүкэ оскуолаларынан тарҕаналлар. «Дани-Алмас» хампаанньа атыы- эргиэн отделын салайааччыта Айталина Крылова этэринэн, оҕо кыра эрдэҕиттэн тыл эйгэтигэр киирэригэр уонна туруктаах тылы-өһү тэрийэргэ көмөлөһөр.

Санатан эттэххэ, Ил Дархан Айсен Николаев сорудаҕынан, «СӨ судаарыстыбаннай уонна официальнай тыллары оннунан хаалларыы» госбырагырааманы үбүлээһин 2023 сылтан икки төгүл кэриҥэ улааппыта уонна 100 мөл. солк. кэриҥэ суумаҕа тэҥнэһэр.