Саха сиригэр тымныылар хаһан түһүөхтэрэй?

Кэлэр нэдиэлэттэн киин улуустарга салгын температурата 40 кыраадыска тиийэ тымныйыаҕа. Бу туһунан СИА-ҕа УГМС салайааччытын солбуйааччы-Гидрометкиин начаалынньыга Татьяна Маршалик иһитиннэрдэ.

«Кэлэр нэдиэлэҕэ, ахсынньы 10-11 күннэригэр, киин улуустарга салгын температурата 40 кыраадыска тиийэ тымныйыаҕа. Дьокуускайга -35…-40 кыраадыс буолуон сөп. Нэдиэлэ ортото тымныйара күүтүллэр», — диэн Татьяна Маршалик иһитиннэрэр.

Эспиэр этэринэн, сэтинньигэ сылаас күн-дьыл өрөспүүбүлүкэ бары улуустарыгар турбут. Бу арҕааттан уонна илиҥтэн көхтөөх циклон кэлиитин кытта сибээстээх. Билигин Приморьеттан циклон кэлбит.