Саха сиригэр Уһук Илиҥҥэ Сбер бастакы оскуолата аһыллыаҕа

Ил Дархан Айсен Николаев уонна “Сбербаан” ПАУо Байкальскайдааҕы салаатын бэрэссэдээтэлэ  Александр Абрамкин Дьокуускай куоракка “Школа 21” аһыллыытыгар бэлэмнэнии үлэлэрин  бэрэбиэркэлээтилэр.  

Айсен Николаев Сбер өрөспүүбүлүкэҕэ  ИТ-каадырдары бэлэмнээһиҥҥэ табыгастаах усулуобуйа олохтуурун туһунан эттэ.  Александр Абрамкин Сберга туһааннаах оскуолалары аһыыга улахан уопуттааҕын уонна выпускниктар  үлэ ырыынагар, чуолаан ИТ-хампаанньаларга үлэ миэстэтин кэбэҕэстик булалларын бэлиэтээтэ.

Үс этээстээх оскуола кампуһа Дьокуускай куоракка Ойуунускай аатынан уулуссаҕа, “Триумф” успуорт уораҕайын таһыгар  баар. Билигин манна өрөмүөн үлэлэрэ ыытыллаллар. Оскуола үс мэндиэмэнигэр автоматизированнай оробуочай миэстэлэр, оонньуур зоналар, сынньанар сирдэр бааллар.

Үөрэх Сбер бэйэтэ оҥорбут анал платформатыгар ыытыллар.

Сбер «Школа 21»  бырайыактара билигин Москваҕа, Казаньҥа, Новосибирскайга, Сургутка үлэлииллэр.