Саха сиригэр Улуу Кыайыы 80 сылыгар 33 пааматынньыгы саҥардыахтара

Аҕа дойду Улуу сэриитин кыттыылаахтарыгар уонна тыыл бэтэрээннэригэр анаммыт 30-тан тахса пааматынньыгы бу сыл ыам ыйын 1 күнүгэр диэри саҥардыахтара. Бу туһунан «Якутия 24» ханаалга «Актуальное интервью» биэриигэ Култуура нэһилиэстибэтин эбийиэктэрин харыстааһыҥҥа управлениетын салайааччытын солбуйааччы Гаврил Терентьев кэпсээтэ.

Кини этэринэн, 2023-2024 сыллар устата барыта 121 пааматынньык саҥардыллыбыт. «Билигин биһиэхэ ааспыт үйэ 50-80-с сылларыгар оҥоһуллубут пааматынньыктар элбэхтэр. Паамытынньыктар тыыннаах туоһутунан Аҕа дойду Улуу сэриитин кыттыылаахтара буолаллар. Онон биһиги, бастатан туран, кинилэри харыстааһыҥҥа кыһаллабыт», — диэн Гаврил Терентьев бэлиэтээтэ.

Ону таһынан 2024 сыл балаҕан ыйын 1 күнүттэн Аҕа дойду Улуу сэриитин кыттыылаахтарын уонна сиэртибэлэрин туһунан үйэтитэр култуура нэһилиэстибэтин эбийиктэрин өрөмүөннүүр үлэтин ыытыы бэрээдэгэ чэпчэтиллибитигэр болҕомтотун уурда. Лицензияҕа ирдэммэт өрөмүөннүүр үлэлэр испииһэгэ быһаарылынна. Үлэлэргэ баҕа өттүнэн волонтердар кыттыахтарын сөп.

«Кырааскаҕа, күрүөнү-хаһааны, билиитэни өрөмүөннээһиҥҥэ лицензия ирдэммэт. Эрэгийиэн суолталаах эбийиэк буоллаҕына биһиги управлениебытыгар биллэрэллэр, оттон олохтоох пааматынньыкка – муниципалитет дьаһалтатыгар. Отчуоту хаартыскаҕа түһэрэн ыытыахтаахтар», — диэн управление салайааччытын солбуйааччы быһаарда. Бу туһунан сиһилии манна ааҕыҥ.