Саха сиригэр улуустары килиимэт уларыйыытыгар сөп түбэһиннэрэргэ анал сүбэлэр оҥоһулуннулар

Саха сиригэр олохтоох бэйэни салайыныы уорганнарыгар килиимэт уларыйыытыгар сөп түбэһиннэрэр тэрээһиннэри ыытыыга анал методологическай сүбэлэр оҥоһулуннулар. Кинилэр эрэгийиэннээҕи килиимэт уларыйыытыгар сөп түбэһиннэрэр былааны олоххо киллэрэр сыаллаах ылылыннылар уонна экстремальнай айылҕа көстүүлэрин уонна күн-дьыл усулуобуйатын уларыйыытын кытта сибээстээх кутталы сэрэтэргэ туһуланаллар.

Бу туһунан СӨ Баһылыгын уонна Бырабыыталыстыбатын пресс-сулууспата иһитиннэрэр.

Килиимэт уларыйыылара Саха сирин экэниэмикэтигэр кутталы үөскэтэллэр. Кэнники научнай чинчийиилэр көрдөрөллөрүнэн, өрөспүүбүлүкэҕэ 23 көрүҥ килиимэт куттала баара быһаарыллыбыт. Саамай киэҥник тарҕаммыт, холобур, уу халаана, ирбэт тоҥ уларыйыыта, ойуур баһаардара, ону таһынан аномальнай итии уонна курааннааһын. Килиимэт уларыйыытыгар сөптөөх Былааҥҥа балары аҕыйатар тэрээһиннэр учуоттаннылар.

«Билиҥҥи кэмҥэ килиимэт бэлиитикэтэ муниципальнай былаастар кыттыыларын бэрээдэктээбэт, ол да буоллар килиимэт уларыйыытын куһаҕан дьайыыта муниципальнай тэриллиилэри үгүстүк таарыйар. Ол иһин бу Методическай сүбэлэр олохтоох бэйэни салайыныы уорганнарыгар уларыйа турар килиимэт кыһалҕаларын сэрэтэргэ улахан хардыынан буолар уонна судаарыстыба таһымыгар ылыллар дьаһаллар чуолкай уонна дьэҥкэ  буолалларын хааччыйыа», — диэн СӨ экэниэмикэтин миниистирэ Петр Попов бэлиэтээтэ.

Оройуоннарга методологическай сүбэлэри оҥоруу чэрчитинэн хас биирдии муниципальнай оройуон айылҕа оҥорор содулун куттала үөрэтилиннилэр уонна сыаналаннылар. Былааннааһын алгоритма оҥоһулунна уонна айылҕа содулун аҕыйатар адаптационнай тэрээһиннэри олоххо киллэрии араас көрүҥнэрэ быһаарылыннылар.

Онон, айылҕа таһаарар кутталлары көдьүүстээхтик салайыы тиһиктээх анаалыһа оҥоһуллар, килиимэт бырагырамааларын уонна былааннары олоххо киллэрии саҕаланар.

Санатан эттэххэ, 2025 сылга СӨ Экологияҕа, айылҕаны туһаныыга уонна ойуур хаһаайыстыбатыгар министиэристибэтэ килиимэт уларыйыытыгар сөптөөх саҥардыллыбыт эрэгийиэннээҕи былааны оҥорбута. Ону таһынан, быйыл эрэгийиэннээҕи углероднай нейтральность торумун бигэргэтии былааннанар.

Сиһилии: https://www.sakha.gov.ru/news/9524