Саха сиригэр уон ойуур баһаарын умуруорууга үлэ барар

Атырдьах ыйын 23 күнүнээҕи туругунан, Саха сиригэр уопсайа 28,2 тыһыынча га иэннээх 14 ойуур баһаара баар. Онтон уонун умуруорарга үлэ барар, биэһэ — бохсулунна. Ол туһунан брифиҥҥэ экология миниистирин солбуйааччы Андрей Коноплев иһитиннэрдэ.

«Ааспыт сууккаҕа Кэбээйигэ 53 га иэннээх ойуур баһаара баара билиннэ, түөрт баһаар умуруорулунна. Уоту утары охсуһууга 513 киһи үлэлиир. Бүгүн баһаар умуруоруллубут сириттэн үлэлээбит дьону таһаартыыр үлэ барыаҕа. Сарсын 100-чэ киһи атын сиргэ үлэлии барыаҕа», — диэн миниистири солбуйааччы иһитиннэрэр.

Өрөспүүбүлүкэҕэ эрэгийиэннээҕи уонна эрэгийиэннэр икки ардыларынааҕы ыксаллаах быһыы-майгы эрэсиимнэрэ биллэриллибиттэрэ.