Саха сиригэр уопсайа 766 ойуур баһаара умуруоруллубут

Саха сиригэр ойуур баһаардара турар кутталлаах сезон саҕаланыаҕыттан, барыта 766 баһаар умуруоруллубут.

Уот хаппыт уопсай иэнэ 1,7 мөл. га диэн СИА суруллар. Оттон ааспыт сууккаҕа 20 350 га иэннээх сиринэн тэнийбит 22 ойуур баһаарын умуруордулар.

Маны таһынан, Горнай, Ньурба, Өлүөхүмэ улуустарыгар бохсуллубут алта баһаар уопсай иэнэ 28 549 га.

—Билигин 108 ойуур баһаара баара бэлиэтэнэр. Ол иһигэр түөрт ураты харыстанар сиргэ. Баһаардар буола турар сорох сирдэригэр ардаата. Онон баһаарынайдар ардах кэнниттэн уоту бохсо охсорго бары күүстэрин уураллар, — диэн этэр СӨ экологияҕа, айылҕаны туһаныыга уонна ойуур хаһаайыстыбатыгар миниистири солбуйааччы Андрей Коноплев.

Ойуур баһаарын умуруорууга 1753 киһи, 151 тиэхиньикэ үлэлиир.

Муниципальнай таһымнаах ыксаллаах быһыы-майгы эрэсиимэ Абый, Бүлүү, Дьааҥы, Үөһээ Бүлүү, Горнай, Өлүөхүмэ улуустарыгар салҕанар.