Саха сиригэр ураты лааҕыр аһыллар

Бу сыл бэс ыйын 15 күнүттэн куорат таһынааҕы оҕону чэбдигирдэр лааҕырдар аһыллан эрэллэр. Лааҕырдар сайыҥҥы сынньалаҥ хампаанньатыгар бэлэмнэрин Үөрэх уонна билим министиэристибэтин “2024 сылга оҕо сынньалаҥын уонна доруобуйатын тупсарыыны тэрийиилэрин, былааннаан миэстэтигэр тиийэн  бэрэбиэркэлээһини ыытыы туһунан” 2024 сыл ыам ыйын 29 күнүнээҕи бирикээһигэр олоҕуран, хамыыһыйа хонтуруоллуур.

Бэс ыйын 13 күнүттэн Үөрэх уонна билим министиэристибэтин итиэннэ “Бэс Чагда” оҕо сынньалаҥын, доруобуйатын чэбдигирдэр киин – Өрөспүүбүлүкэтээҕи ресурснай киин миэстэтигэр тиийэн көрөр былааннаах бэрэбиэркэлэрин саҕалаатылар.

Бастакынан бэрэбиэркэни саҥалара улахан кэһиллиилээх үөрэнээччилэргэ аналлаах өрөспүүбүлүкэтээҕи анал (коррекционнай) интэринээт-оскуола баазатыгар аһыллыбыт  “Колибри” лааҕыр ааста. Хамыыһыйа түмүгүнэн “Колибри” лааҕыр сайыҥҥы чэбдигирдэр хампаанньаҕа олоччу бэлэм.

“Колибри” лааҕыр инбэлиит уонна доруобуйатынан хааччахтаах оҕолору ылар. Тустаах лааҕырга 60 оҕо сынньаныаҕа, доруобуйатын тупсарыныаҕа. Кинилэргэ анаан усулуобуйаны барытын тэрийбиттэр. 21 күн устата оҕолору кытта неврологтар, логопедтар, психологтар уонна да атын исписэлиистэр үлэлэһиэхтэрэ.

Куорат таһынааҕы лааҕырдарга барыларыгар ситиһиилээх үлэни баҕарабыт диэн Үөрэх уонна билим министиэристибэтин телеграм ханаалыгар суруйаллар.