Саха сиригэр устудьуоннар  этэрээттэрин үлэлэрин кэмэ саҕаланна

Дьокуускайга Арассыыйа күнүн бырааһынньыгын сүрүн түгэннэриттэн биирдэстэринэн Саха сирин устудьуоннарын этэрээттэригэр сайыҥҥы үлэ кэмин үөрүүлээх быһыыга-майгыга арыйыы буолла.

Өрөспүүбүлүкэ болуоссатыгар ыытыллыбыт «Россия сильна Единством» тэрээһин чэрчитинэн «Арассыыйа устудьуоннарын этэрээттэрэ» тэрилтэ Саха сиринээҕи отделениетын эрэгийиэннээҕи ыстаабын салайааччы Олег Сергучев  устудьуоннар этэрээттэрэ үлэ сезонугар бэлэмнэрин туһунан иһитиннэрдэ. Ол кэнниттэн СӨ Бырабыыталыстыбатын бэрэссэдээтэлэ Кирилл Бычков үлэ кэмин саҕаламмытынан биллэрдэ.

«Бүгүн биһиги Саха сирин тутууга этэрээттэрин сезонун арыйдыбыт. Мин бу ыччаттары олус ытыктыыбын, кинилэр тутуу эбийиэктэригэр уонна куоракка хайдах үлэлииллэрин билэбин. Бэлиэтээн эттэххэ, бу сэбиэскэй кэмтэн саҕаламмыт улахан быраактыка, биһиги нэһилиэстибэбит, ону Арассыыйа саҥа устуоруйатыгар киэн тутта киллэрэбит. Ол -– көлүөнэлэр сомоҕолоһууларын бэлиэтэ. Утумнааһыҥҥа —  биһиги күүспүт », -– диэтэ Кирилл Бычков.

Саха сирин устудьуоннарын этэрээттэрэ тутуу, тыа хаһаайыстыбатын, үөрэхтээһин, доруобуйа харыстабылын уонна култуура эйгэлэригэр  улахан бырайыактарга сыл аайы кытталлар. Кинилэр кылааттара эрэгийиэннэри сайыннарыыга уонна ыччакка үлэ үгэстэрин иҥэриигэ ураты суолталаах. Быйыл Саха сирин устудьуоннарын этэрээттэрэ бэһис үлэ семестрыгар 3,5 тыһыынчаттан тахса устудьуону уонна үөрэнээччи ыларга былааннаналлар.

СӨ Ил Дарханын уонна Бырабыыталыстыбатын пресс-сулууспата