Саха сиригэр “Уу – куттала суох территория” аахсыйа II түһүмэҕэ саҕаланна
![](https://sakha-sire.ru/wp-content/uploads/2024/07/uu1-1060x596.jpeg)
“Уу – куттала суох территория” аахсыйа II түһүмэҕин чэрчитинэн Быыһыыр сулууспа быыһааччылара уонна исписэлиистэрэ өрөспүүбүлүкэ уулаах сирдэригэр сэрэтэр кэтэбиллэри ыыталлар.
Маннык сэрэтэр кэтэбиллэри Өлүөнэ өрүс боротуохатыгар, Дьокуускай таһынааҕы Эһэлээх арыыга, Нерюнгри, Ньурба уонна Алдан оройуоннарыгар ыыттылар. Кытылга оҕолорун кытта сынньана сылдьар дьоҥҥо, балыксыттарга, тыынан устааччыларга ууттан сэрэхтээх буолар туһунан санаттылар, сэрэтэр кумааҕылары туттардылар.
![](https://sakha-sire.ru/wp-content/uploads/2024/07/uu2.jpeg)
![](https://sakha-sire.ru/wp-content/uploads/2024/07/uu3.jpeg)
![](https://sakha-sire.ru/wp-content/uploads/2024/07/uu4.jpeg)
“Тыынан устааччыларга уонна балыксыттарга биһиги хайаан да быыһыыр сэлиэччик хас биирдиилэригэр баар буолуохтааҕын санатабыт. Ону хайаан да кэтэн баран туттарыахтааххын, алларааҥы быаларын баайыахтааххын, тоҕо диэтэххэ ууга түстэххэ, быаҥ бааллыбатах буоллаҕына начаас ньылбырыс гынан хаалыаххын сөп. Төрөппүттэр оҕолоргутун уу аттыгар көрүүтэ суох хаалларымаҥ. Өйдөөҥ, сөтүөлүүргэ анамматах сирдэр түгэхтэрэ хайдаҕа биллибэт, араас эттиктэр сыталлара буолуо, сүүрэн кэлэн ууга ыстанан улаханнык оһоллонуохха сөп”, — диэн СӨ Быыһыыр сулууспатын 3 кылаастаах быыһааччыта Дмитрий Николайчук этэр.
Быйыл Саха сиригэр нэһилиэнньэ уу кытыытыгар сынньанар 7 миэстэтэ оҥоһулунна:
- Дьокуускайга 202 микро-оройуоҥҥа куорат сөтүөлүүр сирэ;
- Бүлүү к. Оруктаах күөлгэ сөтүөлүүр сир;
- Мэҥэ Хаҥалас улууһун Дьаҥхаада нэһилиэгэр Хотун Мааччыйа сынньалаҥ базатыгар;
- Дьокуускай к. Бүлүүлүүр тыраагын 16 км баар Сугун күөл сөтүөлүүр сирэ;
- Чурапчы улууһун Мындаҕаайы сэл. Бэс диэн сиригэр Амма өрүскэ сөтүөлүүр сир;
- Мэҥэ Хаҥалас улууһун Аллараа Бэстээх бөһ. Абаҕа Күөлүгэр сөтүөлүүр сир;
- Амма өрүскэ Чурапчы улууһун Мындаҕаайы сэл. Адаамка Аппата сиргэ баар сөтүөлүүр сир.
Инспектордар көҥүллэммэтэх сирдэргэ сөтүөлээтэххитинэ, ким да эһиэхэ да, оҕолоргутугар да куттала суох сылдьаргытын хааччыйбат диэн сэрэтэллэр.
Ыксаллаах сулууспаны ыҥырар төлөпүөн нүөмэрэ “112”, СӨ Быыһыыр сулууспатын суһал дьуһуурунайын төлөпүөнэ: (4112) 45-90-19, диэн иһитиннэрэр СӨ Ил Дарханын уонна Бырабыыталыстыбатын пресс-сулууспата.
Сообщить об опечатке
Текст, который будет отправлен нашим редакторам: