Саха сиригэр «ВОИН» киин уон курсаана «гвардеец» үрдүкү аатын ылла

«ВОИН» киин Саха сиринээҕи филиалын уон иитиллээччитэ үөрэххэ үрдүк ситиһиилэрин иһин «курсант-гвардеец» диэн үрдүкү ураты бэлиэҕэ тигистилэр.

Ураты бэлиэлэри туттарыы сиэрэ-туома бу ыйга былааннанар. Ити 2025 сыл сэтинньитигэр киллэриллибит саҥа көҕүлүүр систиэмэ түмүгэр кыаллар буолла. Систиэмэ «новобранецтан» «гвардеецка» диэри хас да таһымтан турар. Кини курсааннар ситиһиилэрин сыаналыырга, күрэхтэһии уонна эппиэтинэс тыынын бөҕөргөтөргө аналлаах.

«Курсант-гвардеец» аат бастыҥтан бастыҥнарга иҥэриллэр. Оҕолор байыаннай-патриотическай уонна спортивнай бэлэмнэниигэ үрдүк көрдөрүүнү ситиһэллэрин таһынан, үгүстүк күрэхтэһиилэр кыайыылаахтара буолаллар уонна Кыайыы Параадын курдук суолталаах тэрээһиннэргэ кытталлар.

Саха сиринээҕи филиал ситиһиитэ бүтүн Арассыыйа таһымыгар биллэрин бэлиэтиэххэ наада: балаҕан ыйын бүтүүтүгэр Саха сирин хамаандата «БУОЙУН Суола» диэн Бүтүн Арассыыйатааҕы бастакы байыаннай-тактическай күрэхтэһиилэргэ кыайыыны ситиспитэ. СӨ Ил Дархана Айсен Николаев бэлиэтээбитинэн, өрөгөйдөөх кыайыы – дьаныардаах эрчиллии уонна күүстээх хамаанда тыынын түмүгэ.

«Биһиги оҕолорбут Саха сирин кута күүстээҕин, оттон ыччат ханнык баҕарар тургутууга бэлэмин дакаастаатылар. Саха сирэ эдэр буойуннарынан киэн туттар! Эһиги – саастыылаахтаргытыгар хорсун быһыы уонна сыалга дьулуур холобура буолаҕыт. Бу кыайыы төрөөбүт өрөспүүбүлүкэбит уонна бүтүн Арассыыйв албан аатын туһугар саҥа ситиһиилэр саҕаланыылара буоллун», — диэн Николаев эҕэрдэлээтэ.