Саха сиригэр «Вызов Первых» күрэхтэһии өрөспүүбүлүкэтээҕи түһүмэҕэ ыытыллар

Бүгүн, кулун тутар 26 күнүгэр, Дьокуускайга «Вызов Первых» успуорт күрэхтэһиитин өрөспүүбүлүкэтээҕи түһүмэҕэ саҕаланна.

«Движение Первых» ыччат уонна оҕо хамсааһыннарын көҕүлээһининэн Дьокуускайга «Вызов Первых» успуорт күрэхтэһиитин өрөспүүбүлүкэтээҕи түһүмэҕэ  дойду Бэрэсидьиэнэ Владимир Путин көмөтүнэн тэриллиннэ. Кулун тутар 17 күнүгэр диэри улуустарынан муниципальнай түһүмэхтэр ыытылыбыттара. Саха сирин бастыҥ оскуолалара, училищелара, кэллиэстэрэ өрөспүүбүлүкэтээҕи түһүмэххэ күрэхтэһэллэр. Кыайыылаахтар ыам ыйыгар ыытыллыахтаах федеральнай түһүмэххэ Саха сирин чиэһин көмүскүөхтэрэ», — диэтэ СӨ Бырабыыталыстыбатын бэрэссэдээтэлин солбуйааччы Ольга Балабкина.

Күрэхтэһии Дьокуускайга «Центр глобального образования» гимназияҕа уонна «Айыы кыһата» оскуолаҕа  оҕолорго түөрт саастарынан ыытыллар: 6-9 саастаах, 10-12 саастаах, 13-15 уонна 16-18 саастаах оҕолор.

Хас биирдии категорияҕа 50-тан тахса хайысхалаах булгуччулаах уонна эбии успуорт көрүҥнэрэ бааллар.  «Вызов Первых»  — бу успуорт күрэхтэһиилэригэр марафона. «Өрөспүүбүлүкэтээҕи түһүмэххэ киирсэргэ бастаан бэйэбит оскуолабытыгар, онтон Дьокуускай куорат оскуолаларын ортолоругар муниципальнай түһүмэххэ бастаатыбыт. Бу түһүмэх кыайыылаахтара хайыы-үйэ Москваҕа ыытыллар Бүтүн Арассыыйатааҕы түһүмэххэ Саха сирин чиэһин көмүскүөхтэрэ», – диэн бастакы хамаанда капитана, Дьокуускай куорат 31 №- дээх оскуолатын 9 кылааһын үөрэнээччитэ Илья Сивцев кэпсиир.

31 №-дээх оскуола 8 кылааһын үөрэнээччитэ Полина Гоманова бэлиэтээбитинэн, күрэх олус интэриэһинэй түһүмэхтэрдээх. «Манна оҕолор ханнык күрэхтэһиилэргэ киирсэллэрин  бэйэлэрэ туруорсубуттара», — диэн «Движение Первых» хамсааһын көхтөөх чилиэнэ эбэн эттэ.

Хамсааһын үлэтэ-хамнаһа сынньалаҥы тэрийиигэ, бары өттүнэн оҕону сайыннарарга уонна идэни ориентациялыырга туһуланар. «Движение Первых» бырайыак дойду гражданнарын патриотическай иитиигэ федеральнай бырайыагын чэрчитинэн олоххо киирэр.

Ил Дархан Айсен Николаев бэлиэтээбитинэн, Саха сирин оҕолоро «Движение Первых» хамсааһыҥҥа  көхтөөхтөрүн көрдөрөллөр. Өрөспүүбүлүкэҕэ дойду Президенэ Владимир Путин көҕүлээһининэн тэриллибит «Движение первых» хамсааһын тэрээһиннэригэр оҕолор уонна ыччаттар кыттыыларын көрдөрүүтэ 26%-ны куоһарда.

 СӨ Ил Дарханын уонна Бырабыыталыстыбатын пресс-сулууспата