Саха сиригэр ыал буолууну регистрациялыыр 17 саҥа миэстэ баар буолла

Саха сиригэр ыал буолууну регистрациялааһын сиэрин-туомун ыытыыны билигин 17 саҥа миэстэҕэ оҥоруохха сөп. Олор истэригэр искибиэрдэр, болуоссаттар, култуура уонна сынньалаҥ пааркалара, атын уопсастыбаннай сирдэр киирэллэр. Бу туһунан от ыйын 31 күнүгэр өрөспүүбүлүкэ ЗАГС-ын управлениетын салайааччы Дария Слепцова иһитиннэрбит.

«Саха Өрөспүүбүлүкэтин Бырабыыталыстыбатын мунньаҕар 2024 сыл алтынньы 26 күнүгэр 401 №-дээх  быһаарыыга <…> уларытыылары киллэрии бырайыага бигэргэтилиннэ», – диэн Дария Слепцова бэйэтин телеграм-ханаалыгар суруйда.

Ол курдук, испииһэккэ өрөспүүбүлүкэ 12 улууһугар саҥа миэстэлэр баар буоллулар:

• Алдан куоратыгар «Сэвэки» култуура-этнографическай комплекс сиригэр;
• Үөһээ Халыма улууһун Зырянка бөһүөлэгин В.И. Ленин аатынан болуоссатыгар;
• Бүлүү улууһун Бүлүү куоратыгар баар Ийэ искибиэригэр;
• Горнай улууһун Бэрдьигэстээх сэлиэнньэтин «Эйгэ» искибиэригэр;
• Мииринэй улуһуун Айхал бөһүөлэгин «Свадебная карета» арт-эбийиэккэ;
• Мииринэй улууһун Миииринэй куоратын ботаническай саадыгар;
• Ньурба улууһун Ньурба куоратын Таптал искибиэригэр, С. Васильев аатынан култуура уонна сынньалаҥ пааркатыгар уонна В.И. Ленин аатынан болуоссатыгар;
• Өлөөн эбээн национальнай улууһун Өлөөн сэлиэнньэтин А.С. Иванов аатынан искибиэригэр;
• Орто Халыма улууһун Орто Халыма куоратын киин болуоссатыгар;
• Сунтаар улууһун Элгээйи сэлиэнньэтин дьоҕус пааркалаах «Узор» социальнай-култуура киинигэр;
• Таатта улууһун Томтор сэлиэнньэтин «Туос Моҕол Ураhа» эбийиэгэр;
• Үөһээ Бүлүү улууһун Үөһээ Бүлүү сэлиэнньэтин «Түгэхтэй» ландшафтнай-этнографическай комплекса;
• Нам удлууһун Кыһыл-Сыыр сэлиэнньэтин «Үс сэргэ» былаһааккатыгар, М.К. Аммосов аатынан болуоссакка уонна Култуура уонна сынньалаҥ пааркатыгар.

Санатан эттэххэ, Дьокуускай куорат Өрөспүүбүлүкэ болуоссатыгар бэс ыйыгар бастакы ыал буолуу регистрациятын сиэрэ-туома буолан ааспыта.