Саха сиригэр үлэтэ суох буолуу уопсай ахсаана 6 % диэри түспүт

Өрөспүүбүлүкэҕэ нэһилиэнньэ үлэлээх буолуутун көрдөрүүтэ эбиллибит. Билигин ити сыыппара 474 тыһ. киһиэхэ тэҥнэһэр, ааспыт сылы кытта тэҥнээн көрдөххө 10 тыһ. элбэх.

Билиҥҥи туругунан өрөспүүбүлүкэ дьарыктаах нэһилиэнньэтин ахсаана 62,7% тэҥнэспит, сыл саҕаланыаҕыттан 0,8 % эбиллибит (Арассыыйаҕа дьарыктаах буолуу сыыппарата 59,8 %).

“Быйыл өрөспүүбүлүкэ бырабыыталыстыбатын кытта өрөспүүбүлүкэни бигэтик хааччыйыыны сайыннарыы миэрэлэрин тэрийбиппит уонна бастакы уочараттаах миэрэлэри олоххо киллэрбиппит. Ылыллыбыт быһаарыылар экэниэмикэ түһүүтүн аччаттылар уонна элбэх көрдөрүү үрдүүрүн ситистибит. Олор истэригэр нэһилиэнньэ дьарыктаах буолуута. Өрөспүүбүлүкэ хас биирдии олохтооҕо үлэлииригэр уонна сөптөөх хамнаһы аахсарыгар усулуобуйа тэриллэр, бу бырамыысыланнаска эрэ буолбакка, экэниэмикэ сырьеттан ураты салаатыгар эмиэ”, — диэн Ил Дархан Айсен Николаев бэлиэтээтэ.

Эрдэ эрэгийэн баһылыга хааччахтааһыны учуоттаан туран, үлэ ырыынагын балаһыанньатын өрүү кэтээн көрөргө нэһилиэнньэ дьарыктаах буолуутун судаарыстыбаннай кэмитиэтигэр сорудахтаан турар.

“Дьарыктаах буолуу бэлиитикэтигэр миэрэлэр уонна үлэ биэрээччилэр көрөр вакансияларын ахсаана үлэ ырыынагын балаһыанньатын бары көрдөрүүтүгэр дьайар”, — диэн нэһилиэнньэ дьарыктаах буолуутугар судаарыстыбаннай кэмитиэт салайааччыта Елена Калашникова этэр.

Эрэгийиэҥҥэ үлэтэ суох киһи ахсаана 6,9%-тан 6% диэри түспүт. Дьарыктаах буолуу уорганнарыгар учуокка турар үлэтэ суох дьон ахсаана түһэ турар итиэннэ билиҥҥи кэмҥэ 5930 киһи буолар, былырыын баччаларга 9371 киһи учуокка турара.

Үлэ биэрээччи үлэһиккэ наадыйыытын сайаапката 2581-нэн эбиллибит итиэннэ 13529 тиийбит.

Ил Дархан уонна Бырабыыталыстыба пресс-сулууспата.