Саха сиригэр үрдүк үөрэх тэриллибитэ 90 сыла

Бу күннэргэ Саха Өрөспүүбүлүкэтин билимэ, үөрэҕин уопсастыбаннаһын бэлиэ сыла – үрдүк үөрэх тэриллибитэ 90 сыла.

Хотугулуу-Илиҥҥи федеральнай университекка Устуоруйа сылыгар “От истоков – в будущее” девизтээх кэккэ тэрээһиннэр ыытыллаллар – быыстапка, кэмпириэнсийэ, кинигэ сүрэхтэниитэ, үөрүүлээх мунньах уонна да атыттар.

ХИФУ билимин бибилэтиэкэтигэр сэтинньи 18 күнүгэр бэрэпиэссэр саалатын аһыллыыта, «О жизни и деятельности педагога-творца, профессора Виктора Даниловича Михайлова» кинигэ сүрэхтэниитэ буолла. Бэрэпиэссэр университекка 40-тан тахса сыл үлэлээбитэ, “Слава и величие” ХИФУ үрдүкү уордьанынан наҕараадаламмыта. Кинигэҕэ бэрэпиэссэр туһунан ахтыылар, бэчээккэ тахсыылар киирдилэр.

Сэтинньи 19 күнүгэр ХИФУ үрдүкү оскуолатын устуоруйатын түмэлэ ураты экспозицияны туруорда. Манна 1934 сылтан Педагогическай институт устуоруйатыгар сыһыаннаах матырыйааллары, ол иһигэр, өрөбөлүүссүйэ иннинэ толору үрдүк үөрэҕи ылбыт 12 олохтоох дьон туһунан матырыйаалы көрдөрүлэр. Ыалдьыттарга Дьокуускайдааҕы судаарыстыбаннай педагогическай институт бастакы дириэктэрэ Иван Жегусов олоҕун уонна үлэтин туһунан билиһиннэрдилэр.

Санатан эттэххэ, ХИФУ төрүттэниитин устуоруйата кэлин Саха судаарыстыбаннай университета буолбут Дьокуускайдааҕы судаарыстыбаннай педагогическай институт  тэриллиэҕиттэн ааҕыллар. 2010 сыллаахха М.К.Аммосов аатынан Саха судаарыстыбаннай университета М.К.Аммосов аатынан Хотугулуу-Илиҥҥи федеральнай университет диэн буолбута.

ХИФУ үөрэх хаачыстыбатын хааччыйар департамена «Новые технологии и стратегии обучения в высшей школе» үрдүк үөрэхтэр икки ардыларынааҕы мэтэдиичэскэй кэмпириэнсийэни ыытыаҕа. Кэмпириэнсийэ соруга – үрдүк үөрэх аныгы систиэмэтигэр үөрэх саҥа технологиятын туһаныыга педагогическай үлэ уопута, идэҕэ үөрэтии хаачыстыбатын үрдэтиигэ билиҥҥи кэмҥэ кыһалҕалары ырытыы.

Университет 50 бэтэрээнин, араас салаалары бүтэрбит дьону кытта көрсүһүүлэри былаанныыллар.

Университет “Хотугулуу-Илиҥҥи үөрэх университетын уокуругун” ассоциациятын оскуолаларын туора туппата үөрдэр. Учуонайдар оскуолаларга лиэксийэлэри ыытыахтара, билим чинчийиилэрин туһунан судургу тылынан кэпсиэхтэрэ. Бэлиэтээн эттэххэ, бу аахсыйаны ХИФУ үтүө үгэскэ кубулутан, чинчийээччилэр үөрэнээччилэри кытта сылга хаста да көрсөллөр.

РФ Билимин уонна үрдүк үөрэҕин министиэристибэтэ эҕэрдэ суругун ыыппыта итиэннэ ХИФУ Уһук Илин федеральнай уокурук инники күөҥҥэ сылдьар үрдүкү оскуолалартан биирдэстэринэн буоларын, Арассыыйаҕа балысханнык сайдар үрдүк үөрэх кыһатынан буоларын  бэлиэтээбитэ.

Кырдьык, М.К. Аммосов аатынан Хотугулуу-Илиҥҥи федеральнай университет геополитическай соругу быһаарар уонна эрэгийиэннэр икки  ардыларыгар улахан инвестиционнай бырайыактар каадырга ирдэбиллэрин толорор соруктаах, естественнэй-научнай, гуманитарнай, физика-тиэхиньиичэскэй хайысхаларга киэҥник үөрэтэр дойду 10 федеральнай үрдүк үөрэхтэриттэн биирдэстэринэн буолар. Бу туһунан Үөрэх уонна билим министиэристибэтин саайта сырдатар.