Саха сиригэр «Земскэй быраас» уонна «Земскэй биэлсэр» бырагыраамалар 2023 сылга 100% толорулуннулар

«Бу бырагыраамалар ааспыт сылга олоххо киириилэрин көдьүүстэрин көрдөрүүтэ 100% тэҥнэстэ. Тыа сирдэригэр 166 мэдиссиинэ исписэлииһэ үлэҕэ ананна — 117 быраас уонна 49 биэлсэр. Бырагыраамалар олоххо киириилэригэр 255 мөл. солк. көрүлүннэ», — диэн СӨ доруобуйа харыстабылыгар миниистирэ Лена Афанасьева иһитиннэрэр.

Дойду бэрэсидьиэнэ Владимир Путин ааспыт сылга быһа лииньийэ кэмигэр Уһук Илин эрэгийиэннэригэр болҕомто уурарга, «Земскэй быраас» бырагыраамаҕа биирдии бырааска 2 мөл.солк., биэлсэрдэргэ 1 мөл.солк. тиийэ көрүллэригэр эппитэ.

Бэрэсидьиэн сорудаҕынан бырагыраама саҥардыллан салҕаныаҕа. Оччотугар эбийиэктэр тутуллуохтара, балыыһалар материальнай-тиэхиньиичэскэй баазалара саҥардыллыаҕа.