Хаартыска: Аграфена Шелковникова тиксэриитэ.
Бу күннэргэ үөрүүлээх сонуну иһиттибит – Ил Дархан уонна Бырабыыталыстыба өйөбүлүнэн, “СӨ 2020-2024 сс. судаарыстыбаннай уонна дьиҥ таһымнаах тыллары чөл хаалларыы уонна сайыннарыы” бырагырааматын чэрчитинэн “Айар” кинигэ кыһата оҥорбут “Саха тылын, литэрэтиирэтин уонна култууратын кэбиниэтэ” анал бырайыага өрөспүүбүлүкэ 100 оскуолатыгар тарҕаныа.
Кэмпилиэккэ сахалыы тылынан 55 таһаарыы киирбит, 6 блоктан турар: “Уус-уран литэрэтиирэ”, “Биллэрэр-көрдөрөр кинигэлэр, тылдьыттар”, “Былакааттар, дидактическай матырыйааллар”, “Олоҥхо эйгэтэ”, “Тылбаас айымньылар”, “Оонньуулар, оонньуурдар”.
Бу кэбиниэт уруккулартан туох уратылааҕын ыйыталаһаары “Айар” кинигэ кыһатын үөрэххэ уонна оҕоҕо аналлаах кинигэ киинин салайааччыта Марина Никифорованы кытта кэпсэтэ сырыттыбыт:
— Бу бырайыагы СӨ Бырабыыталыстыбатын бэрэссэдээтэлин солбуйааччы С.В. Местниковы, Үөрэх уонна билим министиэристибэтин кытта бииргэ сүбэлэһэн оҥордубут. Кэбиниэт кылааһыттан тутулуга суох оскуола бары үөрэнээччилэрин хабар. Урут үксүн уус-уран литэрэтиирэ киирэр эбит буоллаҕына, бу сырыыга аныгылыы оҥоһуллубут көрдөрөр-биллэрэр матырыйааллар, оонньуулар элбэхтэр. Холобура, “Саха эйгэтэ” лото кыра кылаас үөрэнээччилэригэр ордук табыгастаах. Бу оонньуу таҥас-сап, ас-үөл, туттар сэп-сэбиргэл, ыһыах курдук сахалыы эйгэни көрдөрөр. Барыта 15 хонуулаах, 120 карточкалаах. “Дорҕоонноох домино” оонньуу оҕо сахалыы сөпкө саҥарарыгар көмөлөһөр соруктаах толкуйдаммыта”, — диэн кэпсиир.
СӨ Үөрэҕин уонна билимин министиэристибэтигэр иһитиннэрбиттэринэн, кэбиниэт 4 мөл. 688 тыһ. солк. суумалаах. Министиэристибэ үөрэх управлениеларынан үллэрбит, салгыы оскуолаларга тиэрдиэхтээхтэр эбит.
Маны таһынан, өрөспүүбүлүкэ 500 оскуолатыгар “Школьная библиотечка” бырайыак иитинэн оҕолорго аналлаах кинигэлэри тарҕатыахтара. Кэмпилиэккэ нууччалыы, сахалыы тылынан тахсыбыт 18 кинигэни түмпүттэр.
Сахалыы тыллаах уһуйааннар сахалыы литэрэтиирэнэн, матырыйаалынан хааччыллыылара мөлтөх диэн төрөппүттэр бэлиэтии көрөөччүбүт. Быйыл 200 уһуйааҥҥа “Саха эйгэтэ” кэмпилиэги бэлэмнии сылдьаллар. Уопсайа, 50-ча таһаарыы түмүллүбүт. “Манна үксэ саҥа таһаарыылар киирдилэр. Кырачааннарга аналлааҕын быһыытынан оонньуурдара, көрдөрөр матырыйааллара баһыйар. Куукулатыгар, мас оонньууругар тиийэ баар. Былырыын ыытыллыбыт саха тылын, литэрэтиирэтин, култууратын учууталларын өрөспүүбүлүкэтээҕи съеһигэр Ил Түмэн бэрэссэдээтэлин бастакы солбуйааччыта А.Н. Жирков төрөөбүт тылы үөрэтиини, сахалыы эйгэни тэрийиини сүрүн сыал-сорук быһыытынан туруорбута. Бу бырайыактар съезд түмүк уураахтарын олоххо киллэрии үтүө холобурдарынан буолаллар”, — диэн Марина Георгиевна этэр. Сыл түмүктэниэр диэри кэлиҥҥи икки бырайыагы олоччу таһаарар былааннаахтар.
Оҕолорбут кыраларыттан ийэ тылларын умнан эрэллэрин бары даҕаны бэлиэтии көрөбүт. Маны Ил Дархан, Бырабыыталыстыба өйдөөн, өйөөн, кэлиҥҥи сылларга төрөөбүт тылга болҕомто да уурулунна, үп-харчы да көрүлүннэ, сокуон-быраап даҕаны өттүнэн бөҕөргөтүлүннэ. Ол курдук, “СӨ 2020-2024 сс. судаарыстыбаннай уонна дьиҥ таһымнаах тыллары чөл хаалларыы уонна сайыннарыы” судаарыстыбаннай бырагыраамаҕа ааспыт сылларга 56,5 мөл. солк. тыырыллыбыт эбит буоллаҕына, Ил Дархан Айсен Сергеевич Николаев дьаһалынан бу сылга 100 мөл. көрүллүбүтэ.
Үөдүгэй нэһилиэгэр түргэнник ситэр салаанан дьарыктанар дьон ахсаана сыллата эбиллэр. Бүгүн өр сылларга дьиэ көтөрүн…
Профилактическай тэрээһиннэр холбоһуктаах дьаһалларын кэмигэр Өлүөхүмэ оройуонугар ИДьМ учаастактааҕы боломуочунайдара уонна ИДьМ подразделениеларын үлэһиттэрэ арыгы…
Бүгүн, кулун тутар 14 күнүгэр, СӨ Тас сибээстэргэ уонна норуоттар дьыалаларыгар министиэристибэтин кэллиэгийэтин Саха сирин…
ИДьМ 2 №-дээх полициятын дьуһуурунай чааһыгар суотабай төлөпүөнү уорбуттарын туһунан эр киһи сайабылыанньа суруйбут. Эр…
Саха сиригэр анал байыаннай дьайыы кыттыылаахтарын дьоруойдуу быһыыларын үйэтитэр сыаллаах мемориальнай комплекс бырайыагын оҥорууга архитектурнай…
2025 сыл саҕаланыаҕыттан Саха сириттэн 50 массыынаны анал байыаннай дьайыыга тиэртилэр. Тиэхиникэни кытта байыастарга чугас…