Саха сирин 12 маастардара “Душа России” бэстибээлгэ кытыннылар

Ааптар: Саха Сирэ

24.08.2024, 19:30

Хаартыска: «Хаҥалас» хаһыат

Бөлөххө киир:

Кырдьаҕас Суздаль куорат 1000 сылынан аан дойдутааҕы «Душа России» бэстибээл-быыстапкаҕа Саха сирин 12 маастардара кытыннылар. Тарбахтарыгар талааннаахтар бөлөхтөрүн СӨ норуодунай худуоһунньуга Анна Зверева салайар.

Бу туһунан «Хаҥалас» хаһыат суруйар. Саха сириттэн маастардарбыт бэстибээл үөрүүлээх арыллыытыгар кытыннылар. Култуура үтүөлээх үлэһитэ, «Эркээни эдэр сааһа» үҥкүү ансаамбылын өр сылларга салайан кэлбит Василиса Романова тэрээһини саха үҥкүүтүнэн арыйда, биллэр алгысчыт, оһуокайдьыт Людмила Пустолякова алҕаата, арчылаата.

Маннык быыстапкаларга кыаҕа баарынан көх-нэм буолан кыттар Кыһыл Үрүйэттэн Дарья Константинова Суздальга сылдьан кэпсээтэ.

— Суздальга бэстибээлгэ Арассыыйа араас эрэгийиэннэриттэн иис маастардара кырадаһынтан тигиигэ былыргы куорат үбүлүөйдээх сылынан 1000 үлэни аҕалан кыттыбыттарыгар сырыттыбыт. Хаҥалас улууһуттан түөрт буолан кытынныбыт – Василиса Романовнаны кытары үс норуот маастара Евдокия Антипина, Светлана Петрова уонна мин. Биһиги толору ат симэҕин, атын даҕаны тирииттэн, таҥас сыыһыттан үлэлэрбитин илдьэн астына кыттан кэллибит, — кэпсиир маастар Дарья Гаврильевна.

«Бэстибээлгэ култуура бырагыраамата олус киэҥ – үлэни көрдөрүү, билиһиннэрии эрэ буолбакка, маастар-кылаастар, көрсүһүүлэр буоллулар. Итини сэргэ биһиги «Моя Арктика» диэн аныгы этническай муода кэлиэксийэтин көрдөрдүбүт. Манна I Дьөппөнтөн төрүттээх Мотрена Захарова, Анна Зверева үлэлэрэ улахан биһирэбили ыллылар. Оҕолорбут үлэлэрин билиһиннэрдибит. Тэрээһин чэрчитинэн Евдокия Дмитриевна биһикки Азияна Филипповна Харлампьевалыын маастар-кылаас ыыттыбыт, дьон сэргээтэ.

Таарыччы эттэххэ, Евдокия Дмитриевна биһикки бу манна барбыт норуот маастардарын Мира Алексееваны, Мария Аманатованы, Мотрена Захарованы кытары бу саас Казахстаҥҥа Саха сирин күннэригэр быыстапкаҕа кыттыбыппыт. Олус астык этэ. Биһиги атын эрэгийиэннэр үлэлэрин көрөн эмиэ астынан, уопут атастаһан, элбэх саҥаны биллибит уонна Сахабыт сирин маастардарын билиһиннэрэн кэлбиппитинэн киэн туттабыт. Уопсайынан, үлэлэрбит, кэтэ сылдьар таҥаспыт, симэхпит сөхтөрдө», -диир Дарья Константинова.

Людмила Мордовская.

Саха сирин 12 маастардара “Душа России” бэстибээлгэ кытыннылар

Сообщить об опечатке

Текст, который будет отправлен нашим редакторам: