Саха сирин 14 нэһилиэгэр 4G суотабай сибээс тардыллыа

Сыл бүтүөр диэри Саха сирин 14 нэһилиэнньэлээх пуунугар суотабай сибээс ыстаансыйаларын туруоруохтара.

Ыстаансыйалар түргэн 4G стандартка эппиэттиир, интэриниэтинэн хааччыйар буолуохтара. Ситими Ростелеком хампаанньа “Цифровой экэниэмикэ” национальнай бырайыак чэрчитинэн тардар.

Ахсынньы ыйга диэри түргэн интэриниэттээх сибээс тиийиэ: Бүлүү улууһугар Күндэҕэ, Чурапчы улууһугар Сылаҥ нэһилиэгин Оҕуһур түөлбэтигэр, Сунтаар улууһугар Наахараҕа, Тэҥкэҕэ, Толооҥҥо уонна Туойдаахха, Кэбээйи улууһун Арыылааҕар, Мэҥэ Хаҥалас Быраматыгар, Уус Маайаҕа Белькачига, Бүлүүгэ Кировка, Абый улууһугар Абыйга, Томпо улууһугар Ударникка, Алдан Кутанатыгар.