Саха сирин 150 олохтооҕо “Үлэ киһитэ” бириэмийэнэн наҕараадаланна

«Үлэ киһитэ» бириэмийэ араас салааларга үлэлиир дьон үлэҕэ ситиһиилэрин өрөспүүбүлүкэтээҕи билиниитэ буолла.

Ил Дархан Ил Түмэҥҥэ туһаайан этиитигэр 300 000 солк. бириэмийэни 150 киһи ылбытын бэлиэтээбитэ.

“Үлэ чиэһин үрдэтиигэ, үлэ үгэстэрин салгыырга, киһи уопсастыбаҕа киллэрбит кылаатын билиниигэ салгыы үлэлиэхпит. Быйыл үлэ кэлэктииптэрин көҕүлээһиннэринэн «СӨ Бочуоттаах настаабынньыга» бэлиэ олохтоммута. 2026 сылтан саҕалаан бэлиэни кулун тутар 2 күнүгэр Арассыыйа бэрэсидьиэнэ Владимир Путин олохтообут Настаабынньык күнүгэр туттарыахтара”, — диэтэ Айсен Николаев.

«Үлэ киһитэ» бириэмийэҕэ үлэһиттэрин тэрилтэлэр бары туруоруохтарын сөп. Сүрүн критерийдарынан үлэҕэ үрдүк көрдөрүүлээх буолуу, саҥа идеялары олоххо киллэрии, уопутун эдэрдэргэ үөрэтии, үллэстии буолар. Быйыл бу бириэмийэҕэ куонкурус хайыы-үйэ үһүс сылын ыытыллар, диэн иһитиннэрэр Ил Дархан, бырабыыталыстыба пресс-сулууспата.