Саха сирин 41 оскуолатыгар биир да бүтэрээччи биир кэлим эксээмэни туттарбатах

Ил Дархан Айсен Николаев сарсын үөрэх үлэһиттэрин атырдьах ыйынааҕы мунньаҕын улахан тэрээһинигэр кыттыахтаах. Туох соруктары туруоруоҕай?

Оҕолорбутугар хайдах үөрэҕи биэрэрбититтэн биһиги инникибит быһаччы тутулуктаах диэн кини ыйытыыга хоруйдуон иннинэ бэлиэтээтэ.

— Бүгүҥҥү түргэн тэтимнээхтик уларыйа турар олохпутугар үөрэх хаачыстыбата улахан суолталаах. Оҕолорбут ханна үөрэнэллэриттэн тутулуга суох тэҥ хаачыстыбалаах үөрэҕи ылыахтаахтар. Онтон суох кыра кэмпилиэктээх дуу, мөлтөх преподавательскай састааптаах дуу оскуолаларга үөрэнэр оҕолорбутун олоххо үктэнэллэригэр куонкурустаһар кыаҕа суох дьылҕалыыбыт, – диэн эттэ итиэннэ быйыл 10-11-с кылаастардаах 41 оскуолаҕа биир даҕаны оҕо биир кэлим эксээмэни туттарбатаҕыттан соһуйбутун биллэрдэ. “Ол аата эрдэттэн үрдүк үөрэххэ туттарса даҕаны сорумматахтар. Оччоҕо бу оскуолаҕа тоҕо 10-11 кылаас наада диэн ыйытыы үөскүүр. 9-с кылааска хайысхаларынан арааран, сөптөөх исписээлинэһи ылалларын туһугар тохсус кылаас кэнниттэн кэллиэстэргэ ыытар ордук буолбатах дуо?” – диэн эттэ.

Ону кытта быйыл элбэх оҕо биир кэлим эксээмэҥҥэ уустугурдуллубут математиканы, физиканы, химияны, биологияны, информатиканы  талан туттарбыттарын бэлиэтээтэ. Ол да буоллар кыһалҕалар баалларын, ол туһунан этэр ирдэнэрин ыйда.